लुम्बिनी प्राविधिक विश्वविद्यालयको चौथो वार्षिकोत्सव नेपालगञ्जमा सम्पन्न

शिक्षा

गृहपृष्ठ
शिक्षा
लुम्बिनी प्राविधिक विश्वविद्यालयको चौथो वार्षिकोत्सव नेपालगञ्जमा सम्पन्न

लुम्बिनी प्राविधिक विश्वविद्यालयको चौथो वार्षिकोत्सव नेपालगञ्जमा सम्पन्न

बिहीबार, असार १८, २०८३ बागेश्वरी पोस्ट

नेपालगञ्ज । लुम्बिनी प्राविधिक विश्वविद्यालयको चौथो वार्षिकोत्सव नेपालगञ्जमा सम्पन्न भएको छ । विश्वविद्यालयका उपकुलपति प्रा. डा. विनोद प्रसाद ढकालको अध्यक्षता तथा लुम्बिनी प्रदेश सरकारका सामाजिक विकास मन्त्री तथा विश्वविद्यालयका सहकुलपति जन्मजय तिमिल्सिनाको प्रमुख आतिथ्यतामा सम्पन्न कार्यक्रममा प्राविधिक शिक्षाको गुणस्तर, सीपमूलक शिक्षाको विस्तार र दक्ष जनशक्ति उत्पादनका विषयमा जोड दिइएको थियो ।

प्रमुख अतिथि तिमिल्सिनाले प्राविधिक शिक्षालाई रोजगारी, उत्पादन र उद्यमशीलतासँग जोड्न आवश्यक रहेको उल्लेख गर्दै प्रदेश सरकारले प्राविधिक शिक्षाको विकास र विश्वविद्यालयको संस्थागत सुदृढीकरणमा आवश्यक सहयोग गर्ने प्रतिबद्धता व्यक्त गरे । अबको शिक्षा प्रणाली प्रविधिमैत्री र प्राविधिक ज्ञानमा आधारित हुनुपर्नेमा उनको जोड छ । समय अनुसार शिक्षा प्रणालीलाई आधुनिक प्रविधिसँग जोड्न आवश्यक रहेको तिमिल्सिनाले बताए ।

May be an image of one or more people, speaker, dais and text

मन्त्री तिमिल्सिनाले विश्वविद्यालय केवल लुम्बिनी प्रदेशका नागरिकका छोराछोरीका लागि मात्र नभई कर्णाली र सुदूरपश्चिम प्रदेशका नागरिकका छोराछोरीका लागि समेत महत्वपूर्ण शैक्षिक केन्द्रका रूपमा स्थापित हुँदै गएको उल्लेख गरे । उनले गुणस्तरीय प्राविधिक शिक्षा र व्यवहारिक सीप विकासमार्फत युवालाई आत्मनिर्भर बनाउने लक्ष्यका साथ विश्वविद्यालयले महत्वपूर्ण भूमिका खेलिरहेको बताए ।

विश्वविद्यालयका उपकुलपति ढकालले विश्वविद्यालयले छोटो अवधिमै प्राविधिक शिक्षाको क्षेत्रमा महत्वपूर्ण उपलब्धि हासिल गरेको उल्लेख गर्दै शिक्षा, अनुसन्धान, नवप्रवर्तन बीचको सहकार्यलाई अझ प्रभावकारी बनाउँदै दक्ष र प्रतिस्पर्धी जनशक्ति उत्पादनमा विश्वविद्यालय केन्द्रित रहेको बताए । विश्वविद्यालयका रजिष्ट्रार रेग बहादुर भण्डारीले स्वागत मन्तव्य व्यक्त गरेका थिए ।

कार्यक्रममा लुम्बिनी प्रदेश सभा सदस्यहरु मिना श्रेष्ठ, माया पुन, अम्बिका काफ्ले, सुशिला नेपाली (बादी), लुम्बिनी प्रदेश योजना आयोगका उपाध्यक्ष डा. डिल्लीराज बराल, महेन्द्र बहुमुखी क्याम्पस नेपालगञ्जका प्रमुख लालमणि आचार्य, सामाजिक विकास डिभिजन कार्यालय नेपालगञ्जका प्रमुख ऋषि शर्मा, धम्बोझी माविका प्रधानाध्यापक बामदेव सुवेदी, प्याब्सन बाँकेका अध्यक्ष विकास बज्राचार्य, नेपाल पत्रकार महासंघ बाँकेका अध्यक्ष नवीन गिरी लगायतले शुभकामना मन्तब्य ब्यक्त गरेका थिए । ।

कार्यक्रममा लुम्बिनी प्रदेश सभा सदस्य सञ्जु चौधरी, नेपालगञ्जका नगर प्रमुख प्रशान्त विष्ट, बाँकेका प्रमुख जिल्ला अधिकारी दिल कुमार तामाङ, विभिन्न शैक्षिक संस्थाका प्रमुख, सरकारी कार्यालयका प्रतिनिधि, प्राध्यापक, विद्यार्थी तथा सरोकारवालाको उल्लेखनीय उपस्थिति रहेको थियो ।

May be an image of one or more people, people studying and text