डुडुवामा उद्यमशीलता प्रबद्र्धन तालिम

स्थानीय

गृहपृष्ठ
स्थानीय
डुडुवामा उद्यमशीलता प्रबद्र्धन तालिम

डुडुवामा उद्यमशीलता प्रबद्र्धन तालिम

बुधबार, असार २४, २०८३ बागेश्वरी पोस्ट

डुडुवा (बाँके) । बाँकेको डुडुवा गाउँपालिकाले आन्तरिक रोजगारी प्रवद्र्धन तथा वैदेशिक रोजगारीबाट फर्किएका व्यक्तिहरूलाई स्वदेशमै आत्मनिर्भर बनाउने उद्देश्यले उद्यमशीलता प्रवद्र्धन तालिम सञ्चालन गरेको छ । डुडुवा गाउँपालिका रोजगार, सीप तथा उद्यमशिलता केन्द्र शाखाले संचालन गरेको तालिममा वैदेशिक रोजगारीबाट फर्किएका करिब ४० जना युवाहरुको सहभागिता रहेको थियो ।

सहभागीहरूलाई उद्यम सञ्चालनका आधारभूत अवधारणा, व्यवसाय छनोट, व्यवसाय योजना निर्माण, बजार व्यवस्थापन, वित्तीय व्यवस्थापन, बचत तथा लगानी, उत्पादनको गुणस्तर सुधार, डिजिटल प्रविधिको प्रयोग तथा सरकारी निकायबाट उपलब्ध हुने सहुलियत र सेवा सुविधाबारे जानकारी प्रदान गरिएको थियो ।

गाउँपालिका अध्यक्ष नरेन्द्रकुमार चौधरीले वैदेशिक रोजगारीबाट फर्किएका नागरिकको सीप, अनुभव र पुँजीलाई उत्पादनमूलक क्षेत्रमा उपयोग गरी स्थानीय स्तरमै रोजगारी सिर्जना गर्न गाउँपालिका प्रतिबद्ध रहेको बताए । उनले उद्यमशीलता विकासमार्फत आयआर्जन वृद्धि, स्थानीय उत्पादन प्रवद्र्धन तथा आर्थिक समृद्धिमा टेवा पुग्ने विश्वास व्यक्त गरे ।

तालिममा उद्यम सञ्चालन गर्दा देखिने चुनौती, जोखिम व्यवस्थापन, बजारको आवश्यकता अनुसार व्यवसाय छनोट तथा सफल उद्यमी बन्न आवश्यक व्यवहारिक सीपका विषयमा रविन्द्रकुमार ज्ञवालीले सहजीकरण गरेका छन् । सहभागीहरूले आफ्ना अनुभव आदानप्रदान गर्दै स्वदेशमै उद्यम सञ्चालन गर्ने आत्मविश्वास बढेको बताएका थिए ।

वैदेशिक रोजगारीमा पुनः जानुपर्ने बाध्यता कम गर्दै स्थानीय स्रोत, साधन र सीपको उपयोगमार्फत दिगो रोजगारी सिर्जना गर्न सहयोग पुग्ने रोजगार संयोजक अल्का मिश्रले बताइन् । उनका अनुसार गाउँपालिकाले आगामी दिनमा उद्यम स्थापना, वित्तीय पहुँच, बजारसँगको समन्वय तथा व्यवसाय विस्तारका लागि आवश्यक परामर्श र सहजीकरणलाई समेत निरन्तरता दिइनेछ । तालिम दुई दिनसम्मा चल्नेछ ।

प्रकाशित मिति: बुधबार, असार २४, २०८३ २०:५०

प्रतिक्रिया दिनुहोस्