बाँकेमा ९३.०४ प्रतिशत क्षेत्रफलमा धान रोपाइँ सम्पन्न

अर्थ

गृहपृष्ठ
अर्थ
बाँकेमा ९३.०४ प्रतिशत क्षेत्रफलमा धान रोपाइँ सम्पन्न

बाँकेमा ९३.०४ प्रतिशत क्षेत्रफलमा धान रोपाइँ सम्पन्न

शनिबार, साउन १६, २०८३ बागेश्वरी पोस्ट

नेपालगञ्ज । बाँकेमा कुल धान खेतीयोग्य क्षेत्रफलको ९३.०४ प्रतिशतमा धान रोपाइँ सम्पन्न भएको छ । कृषि ज्ञान केन्द्र बाँकेका अनुसार जिल्लामा करिब ३३ हजार ७ सय ८० हेक्टर क्षेत्रफलमा धान खेती हुँदै आएकोमा हालसम्म ३१ हजार ४ सय २९ हेक्टर क्षेत्रफलमा धान रोपाइँ सम्पन्न भएको हो ।

पछिल्लो समय रोपाइँले तीव्र गति लिएको कृषि ज्ञान केन्द्रले जनाएको छ । सिंचाइ सुविधा पुगेका अधिकांश क्षेत्रमा रोपाइँ सकिएको छ भने आकाशे पानीमा निर्भर रहेका केही स्थानमा मात्रै रोपाइँ बाँकी छ ।

कृषि ज्ञान केन्द्र बाँकेका प्रमुख डा। विनोद घिमिरेका अनुसार सिक्टा सिंचाइ आयोजनाको कमाण्ड क्षेत्र तथा अन्य सिंचाइ सुविधा पुगेका स्थानमा किसानले रोपाइँ सम्पन्न गरिसकेका छन् । पर्याप्त वर्षापछि वर्षाको भर पर्नुपर्ने क्षेत्रहरूमा पनि रोपाइँ उल्लेखनीय रूपमा अघि बढेको उनले बताए ।

उनका अनुसार बाँकेमा सामान्यतया असार दोस्रो सातादेखि धान रोपाइँ सुरु भई भदौ पहिलो सातासम्म चल्ने गर्छ । यस वर्ष मनसुन केही ढिलो सक्रिय भएकाले रोपाइँ ढिलो सुरु भए पनि पछिल्ला दिनमा भएको वर्षाले किसानलाई राहत पुगेको छ ।

किसानहरूका अनुसार पछिल्ला केही दिनको वर्षाले खेतमा पर्याप्त चिस्यान पुगेपछि रोपाइँ तीव्र रूपमा अघि बढेको हो । मौसम अनुकूल रही नियमित वर्षा भइरहे बाँकी करिब ६.९६ प्रतिशत क्षेत्रफलमा पनि साउनभित्रै रोपाइँ सम्पन्न हुने अपेक्षा गरिएको कृषि ज्ञान केन्द्रले जनाएको छ ।

प्रकाशित मिति: शनिबार, साउन १६, २०८३ २१:०५

प्रतिक्रिया दिनुहोस्