दोस्रो बाँके युथ कन्क्लेभ नेपालगन्जमा सम्पन्न

समाचार

गृहपृष्ठ
समाचार
दोस्रो बाँके युथ कन्क्लेभ नेपालगन्जमा सम्पन्न

दोस्रो बाँके युथ कन्क्लेभ नेपालगन्जमा सम्पन्न

बुधबार, साउन २७, २०८३ बागेश्वरी पोस्ट

नेपालगन्ज । अन्तर्राष्ट्रिय युवा दिवस २०२६ को अवसरमा दोस्रो बाँके युथ कन्क्लेभ बुधबार नेपालगन्जमा सम्पन्न भएको छ । गैरसरकारी संस्था महासंघ नेपाल, बाँके शाखाको आयोजनामा, बास नेपालको संयोजन तथा स्थानीय तह, नागरिक समाज र विभिन्न संघसंस्थाको सहकार्यमा कन्क्लेभ आयोजना गरिएको हो ।

गैरसरकारी संस्था महासंघ बाँके शाखाका अध्यक्ष मन भण्डारीको अध्यक्षतामा सम्पन्न कार्यक्रममा प्रमुख अतिथि लुम्बिनी प्रदेश सभा सदस्य सुशिला बादी नेपालीले युवालाई विकासको साझेदारका रूपमा अघि बढाउन शिक्षा, सीप, रोजगारी र उद्यमशीलतामा राज्यले विशेष प्राथमिकता दिनुपर्ने बताइन् ।

बैजनाथ गाउँपालिका उपाध्यक्ष निर्मला रोकायले स्थानीय तहले युवाका लागि सीप विकास, रोजगारी र नेतृत्व विकासका कार्यक्रमलाई प्राथमिकता दिँदै आएको बताइन् । युवालाई स्वदेशमै टिकाइराख्न स्थानीय तहका कार्यक्रमलाई थप प्रभावकारी बनाउनुपर्ने उनको भनाइ थियो ।

बाँकेका सहायक प्रमुख जिल्ला अधिकारी पूर्णबहादुर खत्रीले युवाले अधिकारसँगै कर्तव्य र सामाजिक उत्तरदायित्वलाई पनि आत्मसाथ गर्नुपर्ने बताए । युवाको इच्छाशक्ति र सक्रिय सहभागिताबिना सरकारी तथा संस्थागत लगानीले अपेक्षित परिणाम दिन नसक्ने उनको भनाइ थियो ।

राप्तीसोनारी गाउँपालिका प्रवक्ता मिनराज खड्काले युवाका लागि पर्याप्त बजेट तथा कार्यक्रम हुन नसकेको बताउँदै बाँकेमा बढ्दो लागुऔषध दुव्र्यसन न्यूनीकरणका लागि सबै पक्ष एकजुट हुनुपर्नेमा जोड दिए । उनले युवाको सहभागिता स्थानीय तहको योजना निर्माणदेखि कार्यान्वयनसम्म सुनिश्चित गर्नुपर्ने बताए ।

नेपालगन्ज उपमहानगरपालिका शिक्षा, युवा तथा खेलकुद महाशाखा प्रमुख गोर्खबहादुर थापाले युवालाई शिक्षा, खेलकुद, सीप र नेतृत्व विकाससँग जोड्दै अवसर सिर्जना गर्न स्थानीय तह प्रतिबद्ध रहेको बताए । नेपाल पत्रकार महासंघ बाँकेका अध्यक्ष नवीन गिरीले युवाका आवाजलाई नीति निर्माण र सार्वजनिक बहसमा प्रभावकारी रूपमा उठाउन सञ्चार क्षेत्रको भूमिका महत्वपूर्ण रहेको बताए ।

कार्यक्रममा गैरसरकारी संस्था महासंघ बाँकेका सल्लाहकार निर्मला सुनारले युवाको विविधता र सम्भावनालाई सम्बोधन गर्ने समावेशी नीति तथा कार्यक्रम आवश्यक रहेको बताइन् ।

गैरसरकारी संस्था महासंघ नेपालका केन्द्रीय सचिव नमस्कार शाहले ‘अन्तर्राष्ट्रिय युवा दिवस र युवाको विश्वव्यापी बहस’ विषयमा कार्यपत्र प्रस्तुत गरे । उनले नेपालको जनसांख्यिक अवस्थामा युवाको ठूलो हिस्सा रहेको उल्लेख गर्दै उनीहरूको सीप, क्षमता र ऊर्जालाई देश विकासमा उपयोग गर्न तीनै तहका सरकारले प्रभावकारी नीति तथा कार्यक्रम ल्याउनुपर्नेमा जोड दिए ।

कार्यक्रममा बास नेपालका केन्द्रीय अध्यक्ष तथा गैरसरकारी संस्था महासंघ बाँके शाखाका सदस्य शिवकुमार वर्माले स्वागत मन्तव्य दिएका थिए भने शाखाका उपाध्यक्ष ताराप्रसाद खत्रीले कार्यक्रम सञ्चालन गरेका थिए ।

प्रकाशित मिति: बुधबार, साउन २७, २०८३ २०:१३

प्रतिक्रिया दिनुहोस्