पशु सेवा तालिम केन्द्रको वार्षिक कार्यक्रम सार्वजनिक

समाचार

गृहपृष्ठ
समाचार
पशु सेवा तालिम केन्द्रको वार्षिक कार्यक्रम सार्वजनिक

पशु सेवा तालिम केन्द्रको वार्षिक कार्यक्रम सार्वजनिक

बिहीबार, भदौ ४, २०८३ बागेश्वरी पोस्ट

नेपालगन्ज । पशु सेवा तालिम केन्द्र नेपालगन्ज, बाँकेले आर्थिक वर्ष २०८३/०८४ को वार्षिक कार्यक्रम सार्वजनिक गरेको छ । केन्द्रले पशु स्वास्थ्य तथा पशु सेवा क्षेत्रको क्षमता विकास, तालिम, पुनर्ताजगी तालिम लगायतका कार्यक्रमलाई प्राथमिकतामा राखेको जनाएको छ ।

वार्षिक कार्यक्रम सार्वजनिक कार्यक्रममा क्वारेन्टाइन कार्यालयका प्रमुख हरेराम यादव प्रमुख अतिथि रहेका थिए । कार्यक्रममा भेटेरिनरी अस्पताल तथा पशु सेवा विज्ञ केन्द्रकी कार्यालय प्रमुख डा. सपना लक्ष्मी घिमिरेको समेत उपस्थिति थियो ।

कार्यक्रमको उद्देश्यबारे वरिष्ठ मत्स्य विकास अधिकृत रामकेश यादवले प्रकाश पारेका थिए । कार्यालय प्रमुख तथा मत्स्य विकास निर्देशक श्रवणकुमार चौधरीले आर्थिक वर्ष २०८३/०८४ का लागि तय गरिएका कार्यक्रम, बजेट तथा कार्ययोजनाबारे प्रस्तुतिकरण गरेका थिए ।

केन्द्रका अनुसार चालु आर्थिक वर्षमा तालिम, पुनर्ताजगी तालिम लगायत क्षमता विकासका गतिविधिका लागि ९६ लाख ५० हजार रुपैयाँ बजेट विनियोजन गरिएको छ । त्यसैगरी पुँजीगततर्फ १४ लाख रुपैयाँ बजेट छुट्याइएको छ । केन्द्रको कुल वार्षिक बजेट २ करोड ५२ लाख रुपैयाँ रहेको जनाइएको छ ।

कार्यक्रममा पशु सेवा तथा मत्स्य विकास क्षेत्रसँग सम्बन्धित जनशक्तिको क्षमता अभिवृद्धि, सीप विकास तथा सेवा प्रवाहलाई थप प्रभावकारी बनाउने विषयमा समेत छलफल भएको थियो ।

केन्द्रले गत आर्थिक वर्षमा ८२.२५ प्रतिशत वित्तीय तथा कार्यक्रमगत प्रगति हासिल गरेको जनाएको छ । सोही अनुभवका आधारमा चालु आर्थिक वर्षका कार्यक्रमलाई थप प्रभावकारी र परिणाममुखी बनाउने लक्ष्य लिइएको बताइएको छ ।

वार्षिक कार्यक्रम सार्वजनिक कार्यक्रममा पशु सेवा तथा मत्स्य विकास क्षेत्रका कर्मचारी, प्राविधिक तथा संचारकर्मीको सहभागिता रहेको थियो । कार्यक्रम संचालन वरिष्ठ प्राविधिक अधिकृत कर्मध्वज छ्त्यालले गरेका थिए ।

प्रकाशित मिति: बिहीबार, भदौ ४, २०८३ १३:२६

प्रतिक्रिया दिनुहोस्