गण्डकी प्रदेशमा विदेशी पर्यटक घटे

अर्थ

गृहपृष्ठ
अर्थ
गण्डकी प्रदेशमा विदेशी पर्यटक घटे

गण्डकी प्रदेशमा विदेशी पर्यटक घटे

बिहीबार, असोज ३०, २०७६ बागेश्वरी पोस्ट

पोखरा । गण्डकी प्रदेशमा विगत एक महिनामा मात्रै १८ हजारभन्दा बढी विदेशी पर्यटकले भ्रमण गरेका छन्।

गत सेप्टेम्बरमा मात्रै १८ हजार ३ सय ५१ जना पर्यटक यो प्रदेशमा भित्रिएका हुन्। सबैभन्दा बढी भारतीय पर्यटक ७ हजार २ सय १७ जनाले भ्रमण गरेका छन्। ११ हजार १ सय ३४ जना तेस्रो देशका पर्यटक आएका उद्योग, पर्यटन, वन तथा वातावरण मन्त्रालय गण्डकीका पर्यटन महाशाखा प्रमुख कीर्तनराज पौडेलले बताए।

सरकारले गल्याङ, तनहुँ र पोखरा विमानस्थलबाट पर्यटकको तथ्यांक संकलन गर्न थालेको छ। आन्तरिक पर्यटकको तथ्यांक भने अझै राख्न सकेको छैन।

यद्यपि, यो तथ्यांक अघिल्लो वर्षभन्दा आधा कम हो। अघिल्लो वर्षको यही अवधिमा ३१ हजार पर्यटकले गण्डकीको भ्रमण गरेका थिए। यही अगस्टमा चाहिँ १६ हजार पर्यटक यो प्रदेश भित्रिएका थिए।

गण्डकी सरकारले सन् २०१९ लाई आन्तरिक पर्यटन वर्षका रूपमा मनाइरहेको छ। सन् २०२२ सम्म २० लाख विदेशी पर्यटक भित्र्याउने लक्ष्य लिएको सरकारले नयाँ गन्तव्यको खोजी र भैरहेका पर्यटकीय गन्तव्यको व्यवस्थापन गर्न नसक्दा सोचेजति पर्यटक आएका छैनन्।

नेपालको पर्यटन ट्रेकिङमा केन्द्रित छ। पछिल्ला वर्षमा ट्रेकिङ रुट मासेर सडक निर्माण गरेकाले पनि पर्यटकको आगमन घटेको ट्रेकिङ एजेन्सिज एशोसिएसन अफ नेपाल (टान) पोखराका अध्यक्ष हरि भुजेल बताउँछन्।

पछिल्ला वर्षमा नेपालीमा समेत घुम्ने आदत विकास भएको छ। अचेल आन्तरिक पर्यटकले यहाँका होटल रेष्टुरेन्ट भरिएका छन्। असोज, कात्तिक र मंसिर घुम्नका लागि सबैभन्दा उपयुक्त मानिन्छन्। अघिल्लो वर्ष सेप्टेम्बरमा धेरै पर्यटक आएका थिए।

अन्नपूर्ण संरक्षण क्षेत्र आयोजनामा पनि अघिल्लो आर्थिक वर्षमा अहिलेसम्मकै सबैभन्दा धेरै पर्यटकले भ्रमण गरेको तथ्यांक छ। अघिल्लो वर्ष एक्यापमा १ लाख ७९ हजार भन्दा बढी विदेशी पर्यटकले भ्रमण गरे। यसमा सार्क मुलुकका मात्रै ४६ हजार छन्। अन्य मुलुकका १ लाख ३३ हजार छन्।

गण्डकीमा अन्नपूर्ण संरक्षण क्षेत्र आयोजना, मनासलु संरक्षण क्षेत्र आयोजनासहित विभिन्न धार्मिक तथा ऐतिहासिक ठाउँ घुमन्तेका मुख्य गन्तव्य हुन्।

प्रकाशित मिति: बिहीबार, असोज ३०, २०७६ ०७:२९

प्रतिक्रिया दिनुहोस्