योगिनी कप भलिबलमा न्यु एभरेष्ट डिस्लरीको सहप्रायोजन

खेलकुद

गृहपृष्ठ
खेलकुद
योगिनी कप भलिबलमा न्यु एभरेष्ट डिस्लरीको सहप्रायोजन

योगिनी कप भलिबलमा न्यु एभरेष्ट डिस्लरीको सहप्रायोजन

आइतबार, माघ ११, २०७७ बागेश्वरी पोस्ट

नेपालगन्ज । खजुरा गाउँपालिकामा हुन लागेको योगिनी कप अन्तर क्लब पुरुष भलिबल प्रतियोगितामा न्यु एभरेष्ट डिस्लरी प्रालिले सहप्रायोजन गर्ने भएको छ । आज आयोजक योगिनी युवा क्लबका अध्यक्ष र न्यु एभरेष्ट डिस्लरी प्रालिका अध्यक्ष रबिन्द्रमान श्रेष्ठले सम्झौता पत्रमा हस्ताक्षर गर्नुभयो । रंगशाला नेपाल मिडिया प्रालि र योगिनी युवा क्लबले संयुक्तरुपमा आयोजना गर्न लागेको प्रतियोगितामा स्थानीय क्लबको सहभागिता रहने आयोजकले बताएको छ । खजुराको गौघाटमा आगामी माघको २२ गतेदेखि २४ गतेसम्म प्रतियोगिता गर्ने तयारी भइरहेको छ । प्रतियोगितामा १२ क्लबले प्रतिष्पर्धा गर्ने आयोजक योगिनी युवा क्लबका अध्यक्ष तरिन्द्र थापाले बताउनुभयो । आज भएको पत्रकार सम्मेलनमा न्यु एभरेष्ट डिस्लरीका अध्यक्ष श्रेष्ठले स्थानीयस्तरमा हुन लागेको प्रतियोगितालाई सहयोग गर्ने उद्देश्यले प्रायोजन गर्न लागेको बताउनुभयो । उहाँले भन्नुभयो, ‘खेलकुद समाजका युवाहरुलाई संक्रिय बनाउने एउटा सशक्त माध्यम हो । म आफैं पनि खेलाडी भएकोले खेलकुदका प्रतियोगितालाई सहयोग गर्न पाउँदा खुसी लाग्छ । हाम्रो सहयोगले प्रतियोगितालाई सफल गर्नमा मद्धत पुग्नेछ । प्रतियोगिताले स्थानीय स्तरबाट राम्रो खेलाडी उत्पादन गर्नेमा पनि हामीलाई विश्वास छ ।’ आयोजक योगिनी युवा क्लबका अध्यक्ष थापाले प्रायोजन गर्ने न्यु एभरेष्ट डिस्लरीलाई धन्यवाद दिनुभयो । उहाँले भन्नुभयो, ‘हामीले आफ्नो समाजको लागि आफ्नो क्षमता अनुसार योगदान गर्ने उद्देश्यले प्रतियोगिता गर्न लागेको छौं । यसलाई सफल बनाउन थुप्रै संघसंस्थाको सहयोग आवश्यक हुन्छ । न्यु एभरेष्टले प्रायोजन गरेर प्रतियोगिता आयोजनामा थप उत्साह जागेको छ । यसका लागि हामी उहाँहरुलाई हृदयदेखि धन्यवाद दिन चाहन्छौं ।’ खेलकुदको लोकप्रियता भएको गाउँमा भलिबल प्रतियोगिता आयोजना गरेर प्रतिभावान खेलाडी उत्पादन गर्दै त्यस क्षेत्रको आन्तरिक पर्यटन प्रर्वद्धन गर्न पनि भलिबल प्रतियोगिताले सहयोग गर्ने रंगशाला नेपाल मिडिया प्रालिका अध्यक्ष कमल खत्रीले बताउनुभयो । योगिनी माविमा हुने प्रतियोगिताको विजेताले २१ हजार, मेडल ट्रफी र शिल्ड तथा उपविजेताले १० हजार नगद, मेडल, ट्रफी र प्रमाणपत्र पाउनेछ । यसैगरी विधागतरुपमा उत्कृष्ट खेलाडीलाई नगदसहित पुरस्कृत गर्ने आयोजकले बताएको छ ।

प्रकाशित मिति: आइतबार, माघ ११, २०७७ २०:५८

प्रतिक्रिया दिनुहोस्