सातौं प्रधानमन्त्री कप महिला भलिबलको उपाधी एपीएफलाई

खेलकुद

गृहपृष्ठ
खेलकुद
सातौं प्रधानमन्त्री कप महिला भलिबलको उपाधी एपीएफलाई

सातौं प्रधानमन्त्री कप महिला भलिबलको उपाधी एपीएफलाई

मंगलबार, फागुन २५, २०७७ बागेश्वरी पोस्ट

नेपालगन्ज। सशस्त्र प्रहरीको एपीएफ क्लबले सातौं प्रधानमन्त्री कप महिला भलिबल प्रतियोगिताको उपाधी जितेको छ।

नेपालगन्ज रंगशालाको कभर्डहालमा आज भएको फाइनल खेलमा एपीएफले नेपाल पुलिसलाई ३-० को सोझो सेटमा पराजित गरेको हो। एपीएफले पुलिसलाई २५-२२,२५-२१ र २५-१९ को सेटले पराजित गरेको हो।

उपाधी जितेसंगै एपीएफले ५ लाख रुपैयाँ पुरस्कार पाएको छ। फाइनलमा पुलिस विरुद्दको खेलमा एपीएफका खेलाडीहरु उत्कृष्ट प्रदर्शन गरेका थिए। फाइनलमा पराजित पुलिसले २ लाख रुपैयाँ प्राप्त गरेको छ भने प्रतियोगितामा तेस्रो भएको न्यु डायमण्ड क्लबले नगद १ लाख रुपैयाँ प्राप्त गरेको छ। प्रतियोगितामा चौंथो भएको आर्मीले ५० हजार रुपैयाँमै चित्त बुझाएको छ।

प्रतियोगिताको उत्कृष्ट खेलाडीको उपाधी एपीएफकी स्पाइकर सरस्वती चौधरी बनेकी छिन् भने बेष्ट स्पाइकर पुलिसकी निशा भण्डारी बनिन्। प्रतियोगितामा बेष्ट ब्लकर एपीएफकी हिरा केसी बनिन् भने बेष्ट सेटर पुलिसकी कमला पुन भइन भने प्रतियोगिताको बेष्ट लिब्रोमा न्यु डायमण्डकी सलिना श्रेष्ठ घोषित भइन।

त्यस्तै प्रतियोगिताकै बेष्ट सर्भर न्यु डायमण्डकी प्रतिभा माली घोषित भएकी छिन्। प्रतियोगिताको उत्कृष्ट प्रशिक्षकको उपाधी एपीएफका महेश चौधरीले हात पारे। उत्कृष्ट भएका सबै खेलाडीहरुले जनही ५ हजार रुपैयाँ पुरस्कार प्राप्त गरेका छन्।

त्यस्तै प्रतियोगिताकै उत्कृष्ट खेलाडी चौधरीले २५ हजार रुपैयाँ पुरस्कार पाएकी छिन्। एपीएफको यो जितसंगै प्रधानमन्त्री कप महिला भलिबल प्रतियोगिताको उपाधी ३ पटक जित्न सफल बनेको छ।

प्रकाशित मिति: मंगलबार, फागुन २५, २०७७ १८:३८