एन्फा प्रेसिडेन्ट लिग: धम्बोझी र त्रिवेणी युवा क्लब विजयी

खेलकुद

गृहपृष्ठ
खेलकुद
एन्फा प्रेसिडेन्ट लिग: धम्बोझी र त्रिवेणी युवा क्लब विजयी

एन्फा प्रेसिडेन्ट लिग: धम्बोझी र त्रिवेणी युवा क्लब विजयी

बुधबार, चैत ११, २०७७ बागेश्वरी पोस्ट

नेपालगन्ज । लुम्बिनी प्रदेश च्याम्पियन धम्बोझी र गण्डकी प्रदेशको च्याम्पियन त्रिवेणी युवा क्लब लमजुङले एन्फा प्रेसिडेन्ट लिग–२०७७ मा आज जीत हासिल गरेका छन् ।

धम्बोझीले धादिङ समाज धादिङलाई २–१ ले हराएको छ । जीतसँगै धम्बोझीले ९ अंक जोड्दै लिगको शीर्ष चारमा पर्ने सम्भावनालाई जिवितै राखेको छ । अंक तालिकामा १० अंकसहित स्टार सिटी कैलाली शीर्ष स्थानमा छ भने त्रिवेणी र धम्बोझीको समान ९ अंक पुगेको छ । गोलभिन्नताको आधारमा त्रिवेणी दोस्रो स्थानमा छ । जीतपछि धम्बोझीका प्रशिक्षक रबिन्द्र श्रेष्ठले टोलीको च्याम्पियन बन्ने अंक गणितीय सम्भावना कायमै रहेको बताउनुभयो ।

धम्बोझीको जीतमा निशान लिम्बुले दुबै गोल गरेका थिए । उनले खेलको दुई मिनेटमै गोल गरेर टोलीलाई अग्रता दिलाएका थिए । त्यसपछि उनले ६१औं मिनेटमा टोलीका लागी दोस्रो गोल गरे । धादिङको तर्फबाट विजय भुजेलले १६औं मिनेटमा गोल गरेका थिए । खेलमा म्यान अफ द म्याच धम्बोझीका निशान लिम्बु बने । उनलाई खेलकुद पत्रकार मञ्च बाँकेका अध्यक्ष जयनारायण शाहले पुरस्कृत गर्नुभयो ।

यसैगरी नेपालगन्ज रंगशालामा भएको अर्को खेलमा त्रिवेणी युवा क्लब लमजुङले सैनिक फुटबल क्लब झापालाई २–० ले हरायो । त्रिवेणीको जीतमा लक्ष्मण रुचाल र बिमल रानाले गोल गरे । लक्ष्मणले ६१औं मिनेटमा गोल गरेका थिए भने बिमलले ७८औं मिनेटमा गोल गरे । खेलमा त्रिवेणीका लक्ष्मण रुचाल म्यान अफ द म्याच घोषित भए । उनलाई धादिङ जिल्ला फुटबल संघका अध्यक्ष दिपक खतिवडाले पुरस्कृत गर्नुभयो ।

जीतसँगै त्रिवेणीले ४ खेल खेल्दै ३ खेलमा जीत निकालेर ९ अंक जोडेको छ । शीर्ष स्थानको स्टार सिटी युवा क्लब कैलाली भन्दा त्रिवेणी १ अंकले मात्र पछि परेको छ । यसैगरी सैनिक फुटबल क्लबले ४ खेल खेल्दै १ जित र १ बराबरी गरेर ४ अंक जोडेको छ भने २ खेलमा हारको सामना गरेको छ ।

चैतको १५ गतेसम्म चल्ने प्रतियोगितामा प्रदेश नम्बर १ को सैनिक फुटबल क्लब झापा, प्रदेश नम्बर २ को मनकामना युवा क्लब रौतहट, प्रदेश नम्बर ३ को धादिङ समाज धादिङ, प्रदेश नम्बर ४ बाट त्रिवेणी युवा क्लब लमजुङ, लुम्बिनी प्रदेशबाट धम्बोझी युवा क्लब बाँके, प्रदेश नम्बर ६ को लेकाली युवा क्लब जुम्ला र सुदुर पश्चिम प्रदेशको स्टार सिटी युवा क्लब कैलालीले प्रतिष्पर्धा गरिरहेका छन् । प्रतियोगिताको विजेताले १० लाख रुपैयाँ र उपविजेता टोलीले ५ लाख रुपैयाँ पाउनेछन् ।

अखिल नेपाल फुटबल संघले आयोजना गरेको पहिलो प्रतियोगिता हो एन्फा प्रेसिडेन्ट लिग । यस प्रतियोगिताको शीर्ष चार टोलीले राष्ट्रिय लिगमा प्रतिष्पर्धा गरिरहेका छन् ।

प्रकाशित मिति: बुधबार, चैत ११, २०७७ २०:०७