बिश्वकप छनोट:नेपाल र अष्ट्रेलिया भिड्दै

खेलकुद

गृहपृष्ठ
खेलकुद
बिश्वकप छनोट:नेपाल र अष्ट्रेलिया भिड्दै

बिश्वकप छनोट:नेपाल र अष्ट्रेलिया भिड्दै

शुक्रबार, जेठ २८, २०७८ बागेश्वरी पोस्ट

नेपालगन्ज ।सन् २०२२ को कतार विश्वकप तथा सन् २०२३ को चीन एसिया कप छनोट फुटबलको अन्तिम खेलमा नेपालले शुक्रबार राति एसियाको पावरहाउस अष्ट्रेलियासँग खेल्दैछ ।

कुवेतको राजधानी कुवेत सिटीमा शुक्रबार राति ९ः४५ बजे नेपालले पाँच पटक विश्वकप खेलिसकेको समूह बी कै सबैभन्दा बलियो टोलीसँग नेपाल खेल्दै गरेको हो । यो खेल जित्ने नेपालको सम्भावना कुनै पनि कोणबाट देखिँदैन । तर नेपाली टोलीका मूख्य प्रशिक्षक अब्दुल्लाह अलमुताइरी भने नेपाली टिमले अहिलेसम्मकै उत्कृष्ट प्रदर्शन गर्ने दाबी गरिरहेका छन् ।

उनले युवा खेलाडी निकै नै सेट रहेकाले आफ्नो टिमले राम्रो प्रदर्शन गर्ने बताएका हुन् । तर नेपालको राम्रो प्रदर्शन भनेको अष्ट्रेलियासँग कमभन्दा कम गोल खानु नै हो ।

नेपालले अष्ट्रेलियालाई हराएर एसिया कप छनोटको प्लेअफ खेल्ने अवसर पाउने छ भनी आशा गर्नु ठीकै हो तर त्यो परिणाम ल्याउँछ नै भनेर दाबी गर्नु मुख्र्याइँ हो ।

समूहमा ६ खेलबाट १८ अंकसहित अष्ट्रेलिया शीर्ष स्थानमा रहेको छ । नेपाल ६ अंकसहित चौथो स्थानमा छ । पाँच टिम सहभागी समूहमा नेपालले पुछारको चाइनिज ताइपेईलाई दुवै खेलमा हराउँदा जोर्डन र कुवेतसँग दुवै खेल हारेको थियो ।

समूहको एक मात्र अपराजित टोली अष्ट्रेलियाले पहिलो खेलमा नेपाललाई घरेलु मैदानमा ५–० गोल अन्तरले हराएको थियो । सन् २०१९ मा अष्ट्रेलियाको घरेलु मैदानमै नेपालले मात्र ५ गोल खाँदा नेपाली टिमको प्रशंसा भएको थियो।

अष्ट्रेलियाले फिफा वरियतामा निकै नै तल रहेको नेपाललाई जम्मा ५ गोलले हराउँदा थकथक मानेको थियो । अर्थात् नेपालले अष्ट्रेलिया जानुअघि नै पहिलो पटक खेल्दै गर्दा कम्तीमा एक दर्जन गोलको भारी बोक्नुपर्ने हो कि भन्ने आशंका गरेको थियो ।

जेहोस् नेपालले ५ गोल खायो । यसपालि अझ कम गोल खाओस् । युवा खेलाडीहरुले भरिएको टिमप्रति भरोसा भएको प्रशिक्षक अलमुताइरीको भनाइ छ । त्यस्तै अष्ट्रेलियाका प्रशिक्षक पनि नेपाली टिमप्रति आशावादी छन्।

उनी टिमको प्रदर्शनबाट भन्दा पनि नेपाली दर्शकप्रति नतमस्तक छन् । नेपाली दर्शक त्यस्ता हुन् जुन देशमा खेल हुन्छ विद्यार्थी भए पढाइ छाडेर र कामदार भए त्यो दिन बिदा नै लिएर फुटबल हेर्न जान्छन् ।

प्रकाशित मिति: शुक्रबार, जेठ २८, २०७८ १०:४४

प्रतिक्रिया दिनुहोस्