युरोकप:नेदरल्यान्ड र बेल्जियम प्रि-क्वाटरफाइनलमा

खेलकुद

गृहपृष्ठ
खेलकुद
युरोकप:नेदरल्यान्ड र बेल्जियम प्रि-क्वाटरफाइनलमा

युरोकप:नेदरल्यान्ड र बेल्जियम प्रि-क्वाटरफाइनलमा

शुक्रबार, असार ४, २०७८ बागेश्वरी पोस्ट

नेपालगन्ज ।लगातार दोस्रो जितसहित नेदरल्याण्ड्स १६ औं संस्करणको युरोकप फुटबलको राउन्ड अफ सिक्सटिनमा पुगेको छ। बिहीबार राति भएको खेलमा अष्ट्रियालाई पराजित गर्दै नेदरल्याण्ड्स एक खेलअघि नै राउन्ड अफ सिक्सटिनमा पुगेको हो ।

जोहन क्रुफ एरिनाको घरेलु मैदानमा भएको खेलमा नेदरल्याण्ड्स २–० गोल अन्तरले विजयी हुन सफल भयो । नेदरल्याण्ड्सलाई जित दिलाउन मेम्फिस डिपे र डेन्जल डम्फ्रिइजले एक एक गोल गरे ।

खेलको ११ औं मिनेटमा डिपेले पेनाल्टीबाट गोल गर्दै नेदरल्यान्ड्सलाई शुरूआती अग्रता दिलाएका थिए । अष्ट्रियाका कप्तान डेभिड अल्बाले पेनाल्टी क्षेत्रमा डेन्जललाई फाउल गर्दै लडाएपछि नेदरल्याण्ड्सले पेनाल्टी हान्ने अवसर पाएको थियो ।

खेलको ६७ औं मिनेटमा मालेनको पासमा डेन्जलले गोल गर्दै नेदरल्याण्ड्सलाई २–० ले जिताए ।

समूह सी को नेदरल्याण्ड्सले यसअघि युक्रेनलाई ३–२ गोल अन्तरले हराएको थियो । नेदरल्याण्ड्स समूहको शीर्ष स्थानमा रहेको छ।
युक्रेन र अष्ट्रियाको समान ३–३ अंक छ । उत्तरी म्यासेडोनिया अंकविहीन हुँदै पुछारमा छ।

त्यस्तै समूह बी बाट बेल्जियम राउन्ड अफ सिक्सटिनमा पुगेको छ। उत्कृष्ट पुनरागमन गर्दै लगातार दोस्रो जितसहित बेल्जियम नकआउट चरणमा पुगेको हो ।

कोपनहेगनको पार्केन स्टेडियममा बिहीबार राति भएको खेलमा डेनमार्कलाई २–१ गोल अन्तरले पराजित गर्दै बेल्जियम लगातार दोस्रो जित निकाल्न सफल भएको हो ।

बेल्जियमलाई जित दिलाउन थोर्गन हाजार्ड र केभिन डे ब्रुएनाले एक एक गोल गरे ।

खेलमा शुरूआती अग्रता लिएको भए पनि डेनमार्क हार जोगाउन असफल भयो र खेलको दोस्रो मिनेटमै घरेलु डेनमार्कले युसुफ पाउलसेनमार्फत अग्रता लिन सफल भएको थियो ।

तर ५५ औं मिनेटमा हाजार्डले गोल गर्दै बेल्जियमलाई १–१ गोलको बराबरीमा ल्याए । ७१ औं मिनेटमा ब्रुएनाले गोल गर्दै बेल्जियमलाई २–१ को जित दिलाए ।

जितसँगै समूह बी को बेल्जियमले २ खेलमा ६ अंकसहित शीर्ष स्थानमा रहेर एक खेलअघि नै नकआउटमा स्थान बनाएको छ । पहिलो खेलमा बेल्जियमले रुसलाई ३–० गोल अन्तरले हराएको थियो ।

डेनमार्क भने अप्ठेरोमा परेको छ । लगातार दोस्रो हारसहित डेनमार्कको अर्को चरण प्रवेशको सम्भावना कमजोर बनेको छ । पहिलो खेलमा डेनमार्क नवप्रवेशी फिनल्याण्डसँग १–० गोल अन्तरले पराजित भएको थियो ।

रुस र फिनल्याण्डको समान ३–३ अंक रहेको छ । अन्तिम चरणमा बेल्जियमले फिनल्याण्डसँग र रुसले डेनमार्कसँग खेल्नेछ ।

प्रकाशित मिति: शुक्रबार, असार ४, २०७८ १०:५९