युरोकपको दाबेदार जर्मनी पराजित,इङ्गल्याण्ड क्वाटरफाइनलमा

खेलकुद

गृहपृष्ठ
खेलकुद
युरोकपको दाबेदार जर्मनी पराजित,इङ्गल्याण्ड क्वाटरफाइनलमा

युरोकपको दाबेदार जर्मनी पराजित,इङ्गल्याण्ड क्वाटरफाइनलमा

बुधबार, असार १६, २०७८ बागेश्वरी पोस्ट

नेपालगन्ज । जर्मनी १६ औं संस्करणको युरोकप फुटबलको राउन्ड अफ सिक्सटिनबाटै बाहिरिएको छ । मंगलबार राति भएको खेलमा तीन पटकको च्याम्पियन जर्मनीलाई इङ्गल्याण्डले पराजित गरेको हो । लण्डनस्थित वेम्बली स्टेडियममा ऐतिहासिक जित हासिल गर्ने क्रममा इङ्गल्याण्ड २–० गोल अन्तरले विजयी भएको हो ।

५५ वर्षपछि पहिलो पटक जर्मनीलाई नकआउट चरणमा हराउन सफल भएको इङ्गल्याण्डलाई जित दिलाउन रहिम स्ट्रर्लिङ र ह्यारी केनले एक एक गोल गरे । पहिलो हाफ गोलरहित बराबरीमा सकिएको खेलको ७५ औं मिनेटमा स्ट्रर्लिङले गोल गर्दै इङ्गल्याण्डलाई शुरूआती अग्रता दिलाए ।

उनको जारी युरोकपमा स्ट्रर्लिङको तेस्रो गोल हो । त्यस्तै खेलको ८६ औं मिनेटमा कप्तान केनले गोल गर्दै इङ्गल्याण्डलाई २–० को जित दिलाए । जारी युरोमा उनको यो पहिलो गोल हो।

जितसँगै दोस्रो पटक युरोकपको क्वार्टरफाइनलमा पुगेको हो । यसअघि इङ्गल्याण्डले जर्मनीलाई सन् १९६६ को विश्वकप फाइनलमा पराजित गरेयता नकआउटमा पहिलो पटक पराजित गरेको हो ।

यस्तै युक्रेन क्वार्टरफाइनलमा प्रवेश गरेको छ। मंगलबार राति भएको राउण्ड अफ सिक्सटिनको अन्तिम खेलमा स्वीडेनलाई पराजित गर्दै युक्रेन क्वार्टरफाइनलमा पुगेको हो।

स्कटल्याण्डको ह्याम्पडेन पार्कमा भएको खेलमा स्वीडेनलाई अतिरिक्त समयमा २–१ गोल अन्तरले पराजित गर्दै युक्रेनले अन्तिम आठमा स्थान बनाएको हो । युक्रेनलाई जित दिलाउन ओलेक्सान्डर जिन्चेन्को र अर्टिम दोभ्बिकले एक एक गोल गरे । स्वीडेनका इमिल फोर्सवर्गले एक गोल फर्काए ।

निर्धारित ९० मिनेटको खेलमा १–१ गोलको बराबरी भएपछि थपिएको ३० मिनेटको खेलको अन्तिम मिनेटमा अर्टिमले गोल गर्दै युक्रेनलाई जिताए ।

यसअघि २७ औं मिनेटमा जिन्चेन्कोले गोल गर्दै युक्रेनलाई शुरूआती अग्रता दिलाएका थिए । ४३ औं मिनेटमा फोर्सवर्गले गोल गर्दै स्वीडेनलाई १–१ को बराबरीमा ल्याएका थिए।

९८ औं मिनेटमा स्वीडेन १० खेलाडीमा समेटिएको थियो । युक्रेनका अर्टिमलाई खराब ट्याकल गरेपछि मार्कुस डानिलसनले रातो कार्ड पाएका थिए ।

प्रकाशित मिति: बुधबार, असार १६, २०७८ ०७:५७