पारस खड्काले लिए अन्तर्राष्ट्रिय क्रिकेटबाट संन्यास

खेलकुद

गृहपृष्ठ
खेलकुद
पारस खड्काले लिए अन्तर्राष्ट्रिय क्रिकेटबाट संन्यास

पारस खड्काले लिए अन्तर्राष्ट्रिय क्रिकेटबाट संन्यास

मंगलबार, साउन १९, २०७८ बागेश्वरी पोस्ट

नेपालगन्ज ।नेपाली राष्ट्रिय टोलीका खेलाडी पारस खड्काले अन्तर्राष्ट्रिय क्रिकेटबाट संन्यासको घोषणा गरेका छन् । पूर्व कप्तान पारसले मंगलबार बिहानै विज्ञप्ति निकाल्दै अन्तर्राष्ट्रिय क्रिकेटबाट संन्यास लिएको घोषणा गरेका हुन् ।

उनले विज्ञप्तिमा लेखेका छन्, ‘सम्पूर्ण नेपाली क्रिकेटका समर्थक र सरोकारवाला प्रति कृतज्ञता व्यक्त गर्दै अन्तर्राष्ट्रिय क्रिकेटबाट मैले संन्यास लिने निर्णय लिएको छु। नेपालका लागि खेल्नु मेरो जीवनको सर्वश्रेष्ठ उपलब्धि हो।’

नेपाली क्रिकेटका सर्वाधिक सफल कप्तानको रेकर्ड बनाएका अलराउण्डर पारसले नेपाललाई डिभिजन ५ हुँदै एकदिवसीय अन्तर्राष्ट्रिय राष्ट्रको मान्यता दिलाउन सफल भए ।

पारसकै कप्तानीमा नेपालले टी–२० विश्वकप खेलेको थियो । सन् २०१४ मा बंगलादेशमा भएको टी–२० विश्वकपमा नेपालले प्रतिस्पर्धा गरेको थियो ।

पारसले सन् २००४ मा राष्ट्रिय टिमबाट डेब्यु गरेका थिए । उनले त्रिभुवन विश्व विद्यालयको क्रिकेट मैदानमा सन् २००४ को अप्रिल २३ का दिन आईसीसी अन्तरमहादेशीय कपमा मलेसियाविरुद्धको खेलबाट सिनियर टिममा डेब्यु गरेका थिए ।

१० वर्ष राष्ट्रिय टिमको कप्तानी सम्हालेका पारसकै अवधिमा नेपालले कायापलट गरेको थियो । उनी सन् २००९ देखि २०१९ सम्म कप्तानी सम्हालेसँगै अचानक कप्तानी पद छाडेका थिए ।

त्यो नेपाली क्रिकेट इतिहासमा सरप्राइज जस्तै भएको थियो। यसपालि फेरि उनले अन्तर्राष्ट्रिय क्रिकेटबाट संन्यास लिएर प्रशंसकलाई अर्को सरप्राइज दिएका छन् ।

३३ वर्षीय पारसले नेपालका लागि ६ एक दिवसीय अन्तर्राष्ट्रिय खेल खेलेका छन् । जसमा २३५ रन बनाउँदा ९ विकेट लिएका छन् । त्यस्तै १५ वटा टी–२० अन्तर्राष्ट्रिय खेलमा ७७४ रन जोड्दा २ विकेट लिएका छन् ।

प्रकाशित मिति: मंगलबार, साउन १९, २०७८ ०९:४०