साफ च्याम्पियनसिपमा नेपालको विजयी सुरुवात

खेलकुद

गृहपृष्ठ
खेलकुद
साफ च्याम्पियनसिपमा नेपालको विजयी सुरुवात

साफ च्याम्पियनसिपमा नेपालको विजयी सुरुवात

माल्दिभ्स १-० गोलले पराजित

शनिबार, असोज १६, २०७८ बागेश्वरी पोस्ट

नेपालगन्ज । मालदिभ्समा जारी साफ च्याम्पियनसिपको पहिलो खेलमा नेपालले आयोजकलाई पराजित गर्दै विजयी सुरुवात गरेको छ। नेपालले अन्तिम समयमा गोल गर्दै मालदिभ्सलाई पराजित गरेको हो। अङ्क जोडेको छ। मालदिभ्सको मालेमा गए राति भएको खेलमा नेपालले आयोजक मालदिभ्सलाई १–० गोल अन्तरले पराजित गर्दै उत्कृष्ट शुरुआत गरेको छ । नेपालका लागि ८६औँ मिनेटमा मनिष डाँगीले उत्कृष्ट गोल गर्दै नेपाललाई तीन अङ्क दिलाए ।

मनिषले मध्य भागमा पाएको बललाई मालदिभ्सका चार रक्षात्मक खेलाडीहरूलाई छक्क्याउँदै सुन्दर गोल गरे। उनले मालदिभ्सको रक्षापंक्तिलाई छलाउँदै अघि बढेर गोल गरेको दृश्य नेपाली फुटबलमा लामो समय सम्झिने दृश्य रहने छ। खेलको ६९औँ मिनेटमा नवयुग श्रेष्ठको स्थानमा मैदान प्रवेश गरेका मनिषले नेपाललाई एक स्मरणीय गोल दिएका छन्

खेल अवधिभर मालदिभ्सले अधिकांश समय बल आफ्नो नियन्त्रणमा राखेको थियो । नेपालको रक्षापंक्तिले मालदिभ्सको आक्रमणहरूलाई निस्तेज पारिरहे। नेपाली रक्षापंक्तिले अनुशासित भएर खेल्दै मालदिभ्सलाई गोल गर्ने कुनै मौका दिएनन्। नेपाली कप्तान किरण चेम्जोङले सधैँ झैँ केही उत्कृष्ट बचाउहरू गरेका थिए।

नेपालले पनि केही राम्रा आक्रमणहरू गरेको भए पनि गोलमा परिणत हुन सकेको थिएन। नेपाली टोलीले एक ढिक्का भएर खेलेको कारण जित हात पार्न सफल भएको हो । नेपालले सन् १९९९को साफ खेलकुदमा मालदिभ्सलाई पराजित गरेपछि यो पहिलो पटक मालदिभ्सलाई पराजित गरेको हो ।

नेपाली टोलीले २२ वर्ष पछि मालदिभ्सलाई पराजित गरेको हो। यसअघि २२ वर्षको अवधिमा मालदिभ्ससँगको ७ खेल खेलेको नेपाल ५मा पराजित र २ बराबरीमा टुङ्गाएको थियो। अब नेपालले दोश्रो खेल श्रीलंकाविरुद्द पर्सी खेल्नेछ।

प्रकाशित मिति: शनिबार, असोज १६, २०७८ ०७:४०

प्रतिक्रिया दिनुहोस्