नरैनापुरमा भलिबल: नमुना क्लबलाई सफलता

खेलकुद

गृहपृष्ठ
खेलकुद
नरैनापुरमा भलिबल: नमुना क्लबलाई सफलता

नरैनापुरमा भलिबल: नमुना क्लबलाई सफलता

शनिबार, असोज २३, २०७८ बागेश्वरी पोस्ट

नरैनापुर(बाँके) । नरैनापुरमा सम्पन्न भलिबल प्रतियोगितामा नमुना युवा क्लबले जीत हासिल गरेको छ । सृजनशील किशोरी क्लबको आयोजना तथा नरैनापुर गाउँपालिका, स्याक नेपाल र प्लान इन्टरनेशनल नेपालको सहयोगमा जय किसान माविको प्राङ्गणमा विजयादशमीको अवसरमा आयोजित खुला भलिबल प्रतियोगितामा नमुना युवा क्लबले खुला तथा किशोरी दुबैतर्फ जीत हासिल गरेको हो ।

प्रतियोगितामा खुलातर्फ दोश्रो स्थानमा जयकिसान मावि र तेश्रो स्थानमा बघौडा भलिवल क्लबले जित हासिल गरेका छन् । त्यसैगरी किशोरीतर्फ दोश्रो स्थान सृजनशील किशोरी क्लब र तेश्रो स्थान प्रगतिशील किशोरी क्लबले हात पार्न सफल भएका छन । प्रथम, दोश्रो र तेश्रो हुनेले क्रमशः नगद रु.५०००, ४०००, ३००० र प्रमाणपत्र प्राप्त गरेका थिए ।

समापन कार्यक्रमका प्रमुख अतिथि नरैनापुर गाउँपालिकाका अध्यक्ष इस्तियाक अहमद शाहले नगद पुरस्कार र प्रमाणपत्र वितरण गरेका थिए । प्रमाणपत्र वितरण गर्दै शाहले नरैनापुरमा खेलकुदको विकासका लागि दुई वटा रंगशाला निर्माण गरिने जानकारी दिए । अहिले युवा तथा खेलकुद मन्त्री यसै क्षेत्रको भएको हुँदा खेलकुदको विकास हुनेमा आफू ढुक्क भएको समेत उनले बताए । साथै स्थानीय युवा अरुण यादव र नरहरि योगीले नरैनापुरको समग्र विकासको लागि युवा तथा खेलकुद मन्त्रीसंग दशैंपछि भेटघाट गरिने बताए ।

भलिबल प्रतियोगितामा तीन वटा विद्यालय, तीन वटा क्लब सहित छ वटा टिमको महिला र पुरुष गरी जम्मा नौ वटा समूह प्रतिष्पर्धामा थिए । प्रतियोगितामा महेन्द्र मावि मटेहिया, जय किसान मावि भोजपुर, आदर्श मावि लक्ष्मणपुर, नमुना युवा क्लब कोहला, बघौडा युवा क्लब लक्ष्मणपुर र आयोजक सृजनशील किशोरी क्लब सहभागी थिए ।

सो खेलमा तिर्थराम मौर्य र नरहरी योगीले रेफ्रीको भूमिका निभाएका थिए । कार्यक्रम सृजनशील किशोरी क्लब नरैनापुरका अध्यक्ष अन्जली बोहराको अध्यक्षतामा सम्पन्न भएको थियो । नरैनापुर गाउँपालिकाका किशोरीहरुलाई खेलकुदमा अघि बढ्न थप हौसला प्रदान गर्न गाउँपालिकाका प्रमुख प्रशासकीय अधिकृत दल बहादुर बस्नेतको बिशेष पहलमा नरैनापुर गाउँपालिकामा विभिन्न खेलको आयोजना गरिएको प्रतियोगिताका संयोजक अरुण यादवले जानकारी दिए ।

प्रकाशित मिति: शनिबार, असोज २३, २०७८ २०:५३