उद्योग मन्त्री हमालको राजीनामा स्वीकृत

राजनीति

गृहपृष्ठ
राजनीति
उद्योग मन्त्री हमालको राजीनामा स्वीकृत

उद्योग मन्त्री हमालको राजीनामा स्वीकृत

आइतबार, असोज २४, २०७८ बागेश्वरी पोस्ट

नेपालगन्ज । उद्योग वाणिज्य तथा आपूर्ति मन्त्री गजेन्द्रबहादुर हमालले दिएको राजिनामा स्वीकृत भएको छ । हमालको राजीनामा पत्रलाई प्रधानमन्त्री शेरबहादुर देउवाले स्वीकृत गरेका छन् ।

प्रधानन्यायाधीश चोलेन्द्र शमशेर जबराको कोटाबाट मन्त्री बनेको आरोप खेप्दै आएपछि हमालले आज प्रधानमन्त्री शेरबहादुर देउवासमक्ष राजीनामा दिएका हुन् ।

विभिन्न संचार माध्याममा आएका समाचार र कानुनविद्हरुले प्रश्न उठाएपछि हमालले पदबाट राजीनामा गरेको बताएका छन् । ‘सम्माननीय प्रधानमन्त्रीज्यू म लामो समयदेखि कांग्रेसको विभिन्न पदहरुमा सक्रिय रही बाँके जिल्लाको पार्टी सभापति समेत भएर काम गरेकाले पार्टीले सोही अनुसार मूल्यांकन गरेर मन्त्री पदमा नियुक्ति गरेको मैले ठानेको छु’, हमालले राजीनामा पत्रमा भनेका छन्, ‘हाल विभिन्न संचारमाध्यायमहरुमा संप्रेषित समाचार तथा कानुनविद्हरुले मेरो नियुक्तिलाई अन्यायपूर्वक अन्यत्र जोडी समाचार संप्रेषित गरेको र यस्ता समाचारले आफ्नो बर्षौंसम्म लोकतन्त्र, विधिको शासन तथा राज्यका निकायहरुबीच शक्ति पृथकीकरणको सिद्धान्तको लागि लडेको लडाईंको समेत अवमूल्यन भएको बोध भएको छ । तर पनि मेरो नियुक्तिको विषयलाई लिएर प्रश्न उठेबाट म पद भन्दा व्यवस्थाका लागि लडेको व्यक्ति भएकाले यस्तो आशंकाकै बीच मन्त्री पदमा बसिरहन उपयुक्त नलागेकाले मन्त्री पदबाट राजिनामा दिएको छु ।’
लामो समयदेखि कांग्रेसका विभिन्न पदमा रही कार्य गरेका हमाल बाँके कांग्रेसका पूर्व सभापति हुन् ।

प्रकाशित मिति: आइतबार, असोज २४, २०७८ ११:१८

प्रतिक्रिया दिनुहोस्