२८ बर्षपछि नेपाल र भारत फुटबल फाइनलमा भिड्दै

खेलकुद

गृहपृष्ठ
खेलकुद
२८ बर्षपछि नेपाल र भारत फुटबल फाइनलमा भिड्दै

२८ बर्षपछि नेपाल र भारत फुटबल फाइनलमा भिड्दै

बिहीबार, असोज २८, २०७८ बागेश्वरी पोस्ट

नेपालगन्ज । नेपाल पहिलो पटक साफ च्याम्पियनशिप फुटबलको फाइनलमा प्रवेश गर्दै अब उपाधिका लागि चिरपरिचित प्रतिद्धन्द्धी भारतसँग खेल्नेछ । भारतले माल्दिभ्सलाई लिग चरणको अन्तिम खेलमा ३-१ गोलले पराजित गर्दै फाइनल यात्रा तय गरेको हो।

माल्दिभ्समा जारी साफ च्याम्पियनसिप फुटबलको फाइनल भिडन्त शनिबार हुनेछ । लिग चरणको खेलमा भने नेपाल भारतसँग १–० गोल अन्तरले पराजित भएको थियो। तर यसपटक सशक्त देखिएको नेपालले उपाधि जित्ने आशा प्रशिक्षक मोहम्मद अलमुताइरीको छ ।

अलमुताइरीले राजीनामाको समेत घोषणा गरेका छन् । नेपाल फाइनलमा पुगेर इतिहास रचेसँगै उनले राजीनामा दिने घोषणा गरेका हुन्। यसअघि अखिल नेपाल फुटबल संघ एन्फाका पदाधिकारीसँग असन्तुष्टि व्यक्त गर्ने क्रममा उनले फेसबुकमार्फत राजीनामा दिने घोषणा गरेका थिए । उनले राजीनामा भने बुझाएका थिएनन् ।

बंगलादेशविरुद्धको खेलपछि पोस्ट म्याच कन्फरेन्समा बोल्दै अलमुताइरीले पद त्यागको घोषणा गरेका हुन् । उनले नेपाललाई साफको फाइनलमा पुर्याएर इतिहास रचेको र फाइनल आफ्नो अन्तिम खेल भएको बताए ।

उनले भने, ‘मैले साफमा इतिहास बनाएँ । मैले एसिया कपको तेस्रो चरणमा छनोट गराएँ । आज नेपालले मात्र हैन दक्षिण एसियाली क्षेत्रले नेपाली टिमसँग गर्व गर्छ । फाइनल खेल नेपाली राष्ट्रिय टिमसँग मेरो अन्तिम खेल हुनेछ । म त्यसपछि नेपाल फर्किन्न ।’

नेपालले लिगको अन्तिम खेलमा बंगलादेशलाई १–१ गोलको बराबरीमा रोक्दै फाइनलमा स्थान बनाएको हो ।

यसअघि नेपालले माल्दिभ्सलाई २२ वर्षपछि हराउने क्रममा १–० को जित निकालेको थियो।

त्यस्तै नेपालले पाँच टोली सहभागी प्रतियोगितामा श्रीलंकालाई ३–२ ले पराजित गरेको थियो । तेस्रो खेलमा भने नेपाल भारतसँग १–० ले पराजित भएको थियो ।

चौथो खेलमा नेपालले बंगलादेशसँग १-१ गोलको बराबरी खेलेसँगै ७ अंकका साथ दोस्रो स्थानमा रहदै पहिलो पटक साफको फाइनलमा स्थान बनाएको हो ।

यता सात पटकको च्याम्पियन भारत लिगको शीर्ष स्थानमा रहँदै फाइनलमा पुगेको हो । भारतले अन्तिम खेलमा आयोजक एवं डिफेन्डिङ च्याम्पियन माल्दिभ्सलाई ३–१ ले हरायो र ८ अंकसहित शीर्ष स्थानमा रहेर फाइनलमा पुग्यो।

बुधबार राति भएको लिगको अन्तिम खेलमा भारतलाई जित दिलाउन कप्तान सुनिल क्षेत्रीले दुई गोल गरे । मानवीर सिंहले एक गोल गरे । माल्दिभ्सका अलि अस्फाकले एक गोल फर्काए।

लिग चरणमा भारतको ८ र नेपालको ७ अंक हुँदा बाहिरिएको माल्दिभ्सको ६, बंगलादेशको ५ तथा श्रीलंकाको १ अंक रह्यो । नेपाल र भारत २८ बर्षपछि फाइनलमा आमनेसामने हुँदैछन् ।दक्षिण एसियाली महासंघिय खेलकुद (साफ) को छैटौं संस्करणमा नेपाल र भारतले फाइनल खेलेका थिए । सन् १९९३ मा बंगलादेशमा भएको छैटौं सागमा नेपाल र भारतबीच स्वर्ण पदकका लागि प्रतिस्पर्धा भएको थियो । जसमा २–२ को बराबरीपछि नेपाल टाइब्रेकरमा ४–३ ले विजयी भएको थियो ।

प्रकाशित मिति: बिहीबार, असोज २८, २०७८ ०८:३२