दैलेख कांग्रेसमा महिला नेतृ मिना कुमारी थापाको नाम अग्रपंक्तिमा

राजनीति

गृहपृष्ठ
राजनीति
दैलेख कांग्रेसमा महिला नेतृ मिना कुमारी थापाको नाम अग्रपंक्तिमा

दैलेख कांग्रेसमा महिला नेतृ मिना कुमारी थापाको नाम अग्रपंक्तिमा

खुलाबाट महाधिवेशन प्रतिनिधि जित्ने जगतजङ्गकी छोरी मिना

सोमबार, मंसिर १३, २०७८ बागेश्वरी पोस्ट

कांग्रेस नेतृ मिना कुमारी थापा

नेपालगन्ज । दैलेखबाट कांग्रेस महाधिवेशन प्रतिनिधि जितेपछि मिना कुमारी थापा अहिले चर्चामा छिन् । उनले खुला तर्फबाट महाधिवेशन प्रतिनिधिमा जितेकी हुन् । दैलेखमा संस्थापन पक्ष कमजोर देखिएपनि मिना भने महाधिवेशन प्रतिनिधिमा निर्वाचित हुन सफल भइन् ।

२०३२ सालमा दैलेखमै जन्मिएकी थापाले २०४८ सालदेखि स्कुले जीवनबाटै राजनीतिक यात्रा सुरु गरेकी थिइन् । मिना दैलेख कांग्रेसमा अग्रणी स्थानमा नाम आउने स्वर्गीय जगतजङ्ग थापाकी छोरी हुन् । उनका पिता जगतजङ्गको कोरोना भाइरस संक्रमणका कारण गत असार २१ गते निधन भएको थियो ।

महाधिवेशन प्रतिनिधि निर्वाचित भएपछि थापाले बागेश्वरी पोष्टसंग भनिन्, "नेताहरुले मलाई महिला कोटाबाट उम्मेदवार हुन सुझाएपनि मैले खुलामै उम्मेदवारी दिएँ र सबैको मायाले निर्वाचित हुन सफल भएँ ।" उनले महिलाका विचार र भावनाहरुलाई मुखरित गर्न आफू राजनीतिमा क्रियाशील रहको बताइन् । जनताका आकांक्षा र चाहना पूरा गर्न कार्यकारी पदमा पुग्न आवश्यक भएको बताउँदै थापाले अगाडि भनिन्, "बुबाको शिक्षा र दैलेखको भूगोलले मलाई पनि राजनीतिमा तानेको छ, महिला दिदीबहिनीहरुको राजनीतिक आधार बन्ने कोशिस गर्नेछु ।"

महाधिवेशन प्रतिनिधिमा निर्वाचित भएपछि मिनाले बुबाको सपना पूरा गर्ने बताएकी छन् । दैलेखको पार्टी सभापति भएर नेपाली काँग्रेसको राजनीतिक इतिहासमा स्व. थापाले आफ्नो नाम लेखाएका छन् । त्यसलाई जीवन्त राख्न आफू राजनीतिक क्षेत्रमा क्रियाशील भएको मिना बताउँछिन् ।

प्रकाशित मिति: सोमबार, मंसिर १३, २०७८ १९:५९