नेपालगञ्जमा सञ्चालनमा आयो ६५ करोड लागतको किसान फिड मिल

समाचार

गृहपृष्ठ
समाचार
नेपालगञ्जमा सञ्चालनमा आयो ६५ करोड लागतको किसान फिड मिल

नेपालगञ्जमा सञ्चालनमा आयो ६५ करोड लागतको किसान फिड मिल

सोमबार, पुस २६, २०७८ प्रविण गिरी

नेपालगञ्ज । नेपालगञ्जमा किसान फिड मिल सञ्चालनमा आएको छ । नेपालगञ्ज उपमहानगरपालिका वडा नम्बर २१ विर्तामा ६५ करोडको लगानीमा फिड मिल सञ्चालनमा आएको हो । किसान फिड मिल प्रालिको आज एक कार्यक्रमका बीच संघीय सरकारका कृषि तथा पशुपंक्षी विकास मन्त्री महेन्द्र राय यावदले उद्घाटन गरेका हुन् ।

उद्घाटन कार्यक्रमलाई सम्बोधन गर्दै मन्त्री यादवले कृषिलाई आधुनिकीकरण र व्यवसायीकरण नगरेसम्म आर्थिक विकास नहुने बताए । कृषिमा आधारित यस्ता उद्योगहरु बढी भन्दा बढी सञ्चालन हुन सके मात्रै रोजगारी बढ्नुका साथै कृषकको उत्पादनले सही मूल्य र बजार पाउने मन्त्री यादवले बताए ।

फिड मिल सञ्चालक तथा पूर्व सहरी विकास मन्त्री एवम् बाँके क्षेत्र नम्बर २ का सांसद मोहम्मद इश्तियाक राईले भारतबाट कुखुरा, चल्ला र अण्डा लगायत विभिन्न बस्तुको अवधै आयात नरोकिएकोले स्थानीय उद्योगीहरु मारमा परेको बताए । अवैध आयातका कारण नै करोडौं करोड लगानीमा खोलिएका उद्योगहरु धरासायी बन्ने अवस्था रहेकोले प्रहरी प्रशासनले पनि विशेष ध्यान दिनुपर्ने राईले बताए ।

उद्योग सञ्चालनमा आएपछि लुम्बिनी, कर्णाली र सुदुरपश्चिम प्रदेशमा कुखुरा, माछा र पशुको दाना अभाव नहुने उद्योगले जनाएको छ । उद्योगले एक घण्टामा सय क्वीन्टल दाना उत्पादन गर्ने बताइएको छ ।

पूर्व मन्त्री राईसहित उनको परिवार मिलेर संचालन गरेको कृषि व्यवसायका कामहरु मध्ये ५० करोडको लागतमा रजा ग्रुप प्रालि पनि सञ्चालनमा छ । एकैपटक ७५ हजार बोइलर कुखुरा पालन गर्न सकिने गरी रजा ग्रुप सोही ठाउँमा नै सञ्चालन भइरहेको छ । यस्तै सोही स्थानमा २० करोडको लागतमा केही महिनापछि अत्याधुनिक ह्याचरी उद्योग सञ्चालनमा ल्याउने तयारीका साथ काम तीब्ररुपमा भइरहेको पनि बताइएको छ ।