घोराही जेलबाट फरार कैदी परियार नेपालगन्जको जमुनाह नाका पारीबाट पक्राउ

सुरक्षा-अपराध

गृहपृष्ठ
सुरक्षा-अपराध
घोराही जेलबाट फरार कैदी परियार नेपालगन्जको जमुनाह नाका पारीबाट पक्राउ

घोराही जेलबाट फरार कैदी परियार नेपालगन्जको जमुनाह नाका पारीबाट पक्राउ

सोमबार, माघ १०, २०७८ बागेश्वरी पोस्ट

नेपालगन्ज । प्रहरीको मोटरसाइकल लिएर फरार भएका घोराही कारागारका कैदी यमराज परियार पक्राउ परेका छन् ।

कर्तव्य ज्यान मुद्दामा २० वर्ष कैद सजाय पाएर दाङ कारागारमा जेल सजाय भुक्तानी गर्दै आएर प्रहरीकै मोटरसाइकल लिएर गत पुस ८ गते फरार भएका कैदी राजपुर गाउँपालिका दाङका २८ बर्षीय यमराज परियार नेपाल भारत सिमा नाका नेपालगन्ज १५ स्थित जमुनाह नाका नजिक भारतबाट पक्राउ परेका हुन् ।

घोराही कारागारका नाइके समेत रहेका परियार पुस ८ गते ११ बजे कारागारबाट छालाको उपचार गर्न भनेर अस्पताल गएपछि केही बेरपछि अस्पतालबाट घोराही बजारको बिपी चोकस्थित थकाली भान्सा घर एण्ड लजमा गएर खाजा खाने क्रममा सुरक्षामा खटिएका प्रहरी जवान जवान धन बहादुर चौधरीको लु ३१ प १५० नम्बरको मोटरसाइकल लिई फरार भएका थिए ।

प्रहरी प्रधान कार्यालयले इन्टरपोल शाखा मार्फत भारतीय प्रहरीसँँग समन्वय गरी जिल्ला प्रहरी दाङका प्रहरी नायब उपरीक्षक मुकुन्द रिजालको कमान्डको टोलीले फरार परियारलाई आज नेपाल भारत सिमा नाका नेपालगन्ज १५ स्थित जमुनाह नाका नजिक भारतबाट पक्राउ गर्न सफल भएको जिल्ला प्रहरी कार्यालय दाङले जानकारी दिएको छ । परियारलाई आजै जिल्ला प्रहरी कार्यालयमा पत्रकार सम्मेलन गर्दै सार्बजनिक गरेको दाङ प्रहरीले जनाएको छ ।

परियारलाई कारागार ऐन २०१९ को दफा २४ को ३ अनुसार बाँकी कैदको डेढ बढाई कैद सजायको ब्यवस्था अन्तर्गत फेरि सजाय थप हुने दाङ प्रहरीले जानकारी दिएको छ ।

प्रकाशित मिति: सोमबार, माघ १०, २०७८ १८:१४

प्रतिक्रिया दिनुहोस्