बाँके जिल्ला लिग फुटबल:ओशोनिक क्लबको विजयी सुरुआत

खेलकुद

गृहपृष्ठ
खेलकुद
बाँके जिल्ला लिग फुटबल:ओशोनिक क्लबको विजयी सुरुआत

बाँके जिल्ला लिग फुटबल:ओशोनिक क्लबको विजयी सुरुआत

धम्बोझी र कारकाँदो बराबरीमा

शनिबार, फागुन १४, २०७८ बागेश्वरी पोस्ट

नेपालगन्ज । आजदेखि नेपालगन्जमा सुरु भएको बाँके जिल्ला लिग फुटबल प्रतियोगितामा ओशोनिक क्लबले विजयी सुरुआत गरेको छ ।

ओशोनिकले मिलन युवा स्पोर्ट्स क्लबलाई ३–० ले हरायो । नेपालगन्ज रंगशालमा भएको खेलमा ओशोनिकलाई जित दिलाउन क्षितिज राना मगर, गोविन्द खड्का र गणेश बैगारले १–१ गोल गरे ।क्षितिजले २५औं मिनेट, गोविन्दले ४५ र गणेशले ५०औं मिनेटमा गोल गरेका थिए ।

यसैगरी धम्बोझी र कारकाँदो बीचको अर्को खेल १–१ को बराबरीमा सकिएको छ । धम्बोझीका लागि बुद्धदेव शाहीले ९औं मिनेटमा गोल गरेका थिए । पछि कारकाँदोका सृजन बकीले ५१औं मिनेटमा गोल गदैं खेल बराबरीमा लगेका थिए ।

आयोजक बाँके जिल्ला फुटबल संघको आयोजनामा सुरु भएको जिल्ला लिग फुटबलको उद्घाटन आज एक समारोहका बीच बाँके जिल्ला खेलकुद विकास समितिका अध्यक्ष मोहित शाहले गरेका थिए । उद्घाटन कार्यक्रममा मध्यपश्चिम क्षेत्रीय खेलकुद विकास समिति लुम्बिनी प्रदेशका कार्यालय प्रमुख महेश शाह, जिल्ला प्रशासन कार्यालय बाँकेका प्रशासनिक अधिकृत रामकुमार सोनकर लगायतको उपस्थिति रहेको थियो ।

फागुनको ३० गतेसम्म चल्ने लिग फुटबलमा बाँके जिल्ला फुटबल संघसँग आवद्ध ११ टिमले प्रतिष्पर्धा गर्दैछन् । लिगमा सहभागी टिमलाई दुई समूहमा विभाजन गरिएको छ ।

समूह ‘ए’ मा धम्बोझी, कारकाँदो, ओशोनिक, मिलन युवा, रेसिङ सहारा क्लब रहेका छन् । यसैगरी समूह ‘बी’ मा मोडेल टिम, बुद्ध युवा क्लब, जयकिसन स्पोर्ट्स क्लब, न्यु डाँफे स्पोर्ट्स क्लब, युनाइटेड युथ क्लब र नव दुर्गा युवा क्लब रहेका छन् ।

लिग अन्तर्गत् हरेक दिनको पहिलो खेल २ बजे र दोस्रो खेल ३ बजेर ३० मिनेटमा हुने आयोजकले जनाएको छ । लिगको विजेताले बाँके जिल्लाबाट लुम्बिनी प्रदेश लिग फुटबलमा सहभागिता जनाउनेछ ।

प्रकाशित मिति: शनिबार, फागुन १४, २०७८ १९:२८

प्रतिक्रिया दिनुहोस्