सेनाको पश्चिम कमाण्ड र बाँके-११ का बीचमा मैत्रीपूर्ण भेट्रान क्रिकेट

खेलकुद

गृहपृष्ठ
खेलकुद
सेनाको पश्चिम कमाण्ड र बाँके-११ का बीचमा मैत्रीपूर्ण भेट्रान क्रिकेट

सेनाको पश्चिम कमाण्ड र बाँके-११ का बीचमा मैत्रीपूर्ण भेट्रान क्रिकेट

हिमालय शाहको उत्कृष्ट प्रदर्शनमा बाँके-११ विजयी

शनिबार, फागुन २८, २०७८ बागेश्वरी पोस्ट

नेपालगञ्ज । नेपाली सेनाको पश्चिम कमाण्ड हेडक्वाटर र बाँके-११ का बीचमा भएको मैत्रीपूर्ण भेट्रान क्रिकेटमा बाँके--११ विजयी भएको छ । बाँके-११ को जीतमा बाँके ट्राफिक प्रमुख प्रहरी निरीक्षक हिमालय शाहले ५ चौकाको मद्दतमा ३९ रन बनाएका थिए । भैरव प्रसाद गणको आयोजनामा राँझामा खेलिएको मैत्रीपूर्ण खेलमा पश्चिम कमाण्डको नेतृत्व कमाण्ड सेनापति उपरथी प्रेम शाही र बाँके-११ को नेतृत्व नेपाल क्रिकेट संघ (क्यान) का लुम्बिनी र कर्णाली प्रदेशका अध्यक्ष दुर्गा थापाले गरेका थिए ।

टस जितेर पश्चिम कमाण्डले फिल्डिङ रोजेको थियो । कमाण्ड सेनापति उपरथी शाहीले गरेको पहिलो ओभरको पहिलो बलमै सहज क्याच छुटेको थियो । कप्तान दुर्गा थापा र हिमालय शाहले पारी सम्हालेपछि बाँके-११ ले निर्धारित २० ओभरमा १५५ रन बनाएको थियो । शाहले ३९, थापाले ३१ रन र जमिलले १७ रन जोडेका थिए ।शाहको उत्कृष्ट ब्याटिङले बाँके-११ ले विजय हासिल गरेको हो ।

No description available.

१५६ रनको लक्ष्य लिएर व्याटिङ गर्न आएका पश्चिम कमाण्डका ओपनर पहिलो ओभरमै मेराज अन्सारीको बलमा क्याच आउट भएका थिए । उपरथी शाही, पूर्व सहायक रथी राम राणा र प्रमुख सेनानी संजिव सिजापतिले राम्रो प्रदर्शन गरेपछि पश्चिम कमाण्डले १३५ रन बनाएको थियो । मैत्रीपूर्ण खेलमा पश्चिम कमाण्डबाट मेजर दिप श्रेष्ठ, अशोक शाही, प्रबिण थापा, लेफ्टीनेन्ट नेहाल चन्द र सञ्जीव ढुंगानाले खेलेका थिए ।

बाँके-११ बाट जमिल अन्सारी, दिपेन्द्रप्रताप सिंह, शशिरञ्जन कर्ण, विनोद कर्ण, विक्रम श्रेष्ठ, इरफान खान, जावेद सिद्धिकी, जाकिर सिद्धिकी लगायत खेलेका थिए । खेलस्थलमा पूर्व सिंचाई मन्त्री दीपक गिरी, संविधानसभा सदस्य राजीवविक्रम शाह लगायत उपस्थित थिए । भैरव प्रसाद गणले नागरिक-सैनिक सम्बन्ध सुदृढ गर्न मैत्रीपूर्ण खेलहरु आयोजना गर्दै आएको छ । उक्त खेलमा ४० रन बनाउँदै २ विकेट लिएका पूर्व सहायक रथी राम राणा म्यान अफ द म्याच घोषित भएका थिए ।

प्रकाशित मिति: शनिबार, फागुन २८, २०७८ २१:४८

प्रतिक्रिया दिनुहोस्