आठौं प्रधानमन्त्री कप महिला भलिबलको उद्घाटन भोली

खेलकुद

गृहपृष्ठ
खेलकुद
आठौं प्रधानमन्त्री कप महिला भलिबलको उद्घाटन भोली

आठौं प्रधानमन्त्री कप महिला भलिबलको उद्घाटन भोली

बुधबार, चैत ९, २०७८ बागेश्वरी पोस्ट

नेपालगन्ज । आठौं सगरमाथा सिमेन्ट प्रधानमन्त्री कप महिला भलिबल भोलीदेखि सुरु हुँदैछ । त्यसका लागि सम्पूर्ण तयारी पूरा भएको छ । आज नेपालगन्ज रंगशालामा आयोजित पत्रकार भेटघाटमा पिएम कपका संस्थापक अध्यक्ष टीएस ठकुरीले सबै तयारी पूरा भएको जानकारी गराए ।

नेपाल भलिबल संघको स्वीकृतिमा हुने प्रधानमन्त्री कप चैत १० देखि १४ गतेसम्म नेपालगन्ज रंगशालास्थित कभर्डहलमा हुँदैछ । विगतका बर्षहरुमा भन्दा यसपटक कोरोना महामारीका कारण केही समय ढिला हुन गएको आयोजकले जनाएको छ ।

‘प्रधानमन्त्री कप भलिबल प्रतियोगितालाई नेपालगन्जको चिनारीको रुपमा विकास गर्ने हाम्रो प्रयास हो ।’ मूल आयोजक समिति संयोजक लुम्बिनी प्रदेश सदस्य कृष्णा केसी नमुनाले भनिन्–‘दक्षिण एशियाकै नम्बर एक क्लब च्याम्पियनसीपका रुपमा प्रधानमन्त्री कपलाई स्थापित गराउने हाम्रो लक्ष्य रहेको छ ।’

प्रतियोगितामा आयोजक सहित नेपालका शीर्ष चार र भारतका दुई टिमको सहभागिता रहनेछ । लिगकम नकआउट प्रणालीमा सञ्चालन हुने प्रतियोगितामा नेपाल पुलिस क्लब, नेपाली सेनाको त्रिभुवन आर्मी क्लब, न्यु डायमन्ड एकेडेमी, आयोजक लुम्बिनी युनाइटेड, भारतको छत्तीसगढ स्पोर्ट्स एकेडेमी (महाराष्ट्र) र हरियाना स्पोर्ट्स क्लब रहेका छन् ।

सम्पूर्ण खेलाडीको आवास तथा भोजन कोहलपुरस्थित पाँच तारे होटल सेन्ट्रल प्लाजामा व्यवस्थापन गरिएको छ । खेलाडीको बसोबास कोहलपुर तथा खेल सञ्चालन नेपालगञ्जमा हुँदा पुरानो शहर नेपालगञ्ज र उदाउँदो शहर कोहलपुरलाई भावनात्मक एकतामा जोड्ने अपेक्षा गरिएको अध्यक्ष ठकुरीले बताए ।

प्रकाशित मिति: बुधबार, चैत ९, २०७८ २०:१८

प्रतिक्रिया दिनुहोस्