प्रधानमन्त्री कप महिला भलिबलः सेमीफाइनल समीकरण पूरा

खेलकुद

गृहपृष्ठ
खेलकुद
प्रधानमन्त्री कप महिला भलिबलः सेमीफाइनल समीकरण पूरा

प्रधानमन्त्री कप महिला भलिबलः सेमीफाइनल समीकरण पूरा

आर्मी र पुलिस तथा हरियाणा र न्यू डायमण्ड भिड्ने

शनिबार, चैत १२, २०७८ बागेश्वरी पोस्ट

नेपालगञ्ज । त्रिभुवन आर्मी क्लब, भारतको हरियाणा स्पोर्ट्स क्लब, नेपाल पुलिस क्लब र न्यू डायमण्ड आठौं सगरमाथा सिमेन्ट प्रधानमन्त्री कप महिला भलिबल प्रतियोगिताको समीफाइनलमा प्रवेश गरेका छन् । आर्मी र हरियाणाले आ-आफ्नो समूहबाट विजेता तथा न्यू डायमण्ड र पुलिसले उपविजेता बन्दै सेमीफाइलनको यात्रा तय गरेका हुन् ।

नेपालगञ्ज रंगशालास्थित कभर्डहलमा आज भएको पहिलो खेलमा हरियाणाले आयोजक लुम्बिनी युनाइटेडलाई ३-० को सोझो सेटमा पराजित गरेको हो । हरियाणाले लुम्बिनीलाई २५-१५, २५-७ र २५-१३ को सेटमा हराएको हो ।

यस्तै दोस्रो खेलमा आर्मीले भारत छत्तिसगढको एकलब्य स्पोर्ट्स कम्प्लेक्सलाई पनि ३-० को सोझो सेटमा हराएको हो । आर्मीले एकलब्यलाई २५-१२, २५-१२ र २५-१२ को सेटमा पराजित गरेको हो । भोली हरियाणा र न्यू डायमण्डबीच पहिलो सेमीफाइनल खेल हुँदा आर्मी र पुलिसबीच दोस्रो सेमीफाइलन खेल हुनेछ ।

लिगकम नकआउटका आधारमा भइरहेको प्रतियोगितामा नेपाल पुलिस क्लब, त्रिभुवन आर्मी क्लब, न्यु डायमन्ड एकेडेमी, आयोजक लुम्बिनी युनाइटेड, एकलब्य स्पोर्ट्स कम्प्लेक्स छत्तिसगढ र हरियाणा स्पोर्ट्स क्लब सहभागी भएकोमा एकलब्य र लुम्बिनी प्रतियोगिताबाट बाहिरिएका छन् ।

चैत १४ गतेसम्म चल्ने प्रतियोगितामा विजेताले ५ लाख, उपविजेताले २ लाख ५० हजार, तेस्रो हुनेले एक लाख र चौथो हुनेले ५० हजार रुपैयाँ प्राप्त गर्ने प्रधानमन्त्री कपका संस्थापक अध्यक्ष टीएस ठकुरीले बताए ।

प्रकाशित मिति: शनिबार, चैत १२, २०७८ १९:४९

प्रतिक्रिया दिनुहोस्