जिल्ला समन्वय समिति बाँकेको निर्वाचनका लागि आज मनोनयन दर्ता

आम निर्वाचन-२०७९

गृहपृष्ठ
आम निर्वाचन-२०७९
जिल्ला समन्वय समिति बाँकेको निर्वाचनका लागि आज मनोनयन दर्ता

जिल्ला समन्वय समिति बाँकेको निर्वाचनका लागि आज मनोनयन दर्ता

बुधबार, जेठ २५, २०७९ बागेश्वरी पोस्ट

नेपालगञ्ज । जिल्ला समन्वय समिति (जिसस) बाँकेको निर्वाचनका लागि आज मनोनयन दर्ता हुँदैछ । विहान १० बजेदेखि दिउँसो २ बजेसम्म मनोनयन दर्ता गरिनेछ । शिक्षा विकास तथा समन्वय इकाईस्थित मुख्य निर्वाचन अधिकृतको कार्यालयमा उम्मेदवारी दर्ता गरिँदैछ । मुख्य निर्वाचन अधिकृतको कार्यालयका अनुसार जेठ २७ गते बिहान ११ देखि १ बजेसम्म निर्वाचन हुनेछ ।

बाँकेमा १ उपमहानगरपालिका, १ नगरपालिका र ६ गाउँपालिका गरी ८ वटा स्थानीय तह छन् । ती मध्ये समन्वय समितिमा नेपाली कांग्रेसको एकल बहुमत छ । कांग्रेसले एक नगरपालिका गरी चार गाउँपालिकामा प्रमुख र उपप्रमुख जितेको छ भने दुई एक गाउँपालिकामा उपाध्यक्ष जितेको छ । कांग्रेसले नेपालगञ्ज उपमहानगरपालिकामा प्रमुख जितेको छ । १६ मध्ये कांग्रेसका १२ जना मतदाता छन् ।

गाउँपालिका र नगरपालिकामा निर्वाचित प्रमुख, उपप्रमुख, वडा अध्यक्ष र सदस्यहरु समेत जिल्ला समन्वय समिति प्रमुखमा उम्मेदवार हुन पाउँछन् । जिल्ला समन्वय समितिको प्रमुख र उपप्रमुख चुनिनका लागि मतदान भने गाउँपालिका अध्यक्ष र उपाध्यक्ष तथा नगरपालिकाका प्रमुख र उपप्रमुखले मात्रै गर्न पाउँछन् ।

जिल्ला समन्वय समितिमा प्रमुख र उपप्रमुख सहित ९ सदस्य निर्वाचित हुन्छन् । समितिमा तीन सदस्य महिला अनिवार्य हुने व्यवस्था छ । स्थानीय तह निर्वाचन ऐन ०७३ अनुसार गाउँपालिका र नगरपालिकामा निर्वाचित प्रमुख, उपप्रमुख, वडा अध्यक्ष र सदस्यहरु समेत जिल्ला समन्वय समितिमा उम्मेदवार हुन पाउँछन् ।

अन्य तीन जना सदस्यहरु गाउँपालिका र नगरपालिकाबाट निर्वाचित सदस्यहरुबाट उम्मेदवार भएर आउँछन् । उनीहरु पनि जिल्ला समन्वय समितिका प्रमुख र उपप्रमुख जस्तै गरी निर्वाचित हुनुपर्ने ऐनमा व्यवस्था छ ।

जिल्ला समन्वय समिति गठन भएपछि जिल्ला सभा गठन हुनेछ । जिल्ला सभाको प्रमुख र उपप्रमुखमा जिल्ला समन्वय समितिकै प्रमुख र उपप्रमुख हुनेछन् भने गाउँपालिका र नगरका प्रमुख उपप्रमुखहरु पदेन सदस्य हुनेछन् ।

प्रकाशित मिति: बुधबार, जेठ २५, २०७९ ०८:२६