जिल्ला समन्वय बाँकेको उपप्रमुखमा कार्की निर्विरोध, प्रमुखमा दुई जना उम्मेदवार

आम निर्वाचन-२०७९

गृहपृष्ठ
आम निर्वाचन-२०७९
जिल्ला समन्वय बाँकेको उपप्रमुखमा कार्की निर्विरोध, प्रमुखमा दुई जना उम्मेदवार

जिल्ला समन्वय बाँकेको उपप्रमुखमा कार्की निर्विरोध, प्रमुखमा दुई जना उम्मेदवार

खुला र दलित पनि निर्विरोध, महिला सदस्यमा ४ जनाको उम्मेदवारी

बुधबार, जेठ २५, २०७९ बागेश्वरी पोस्ट

नेपालगञ्ज । जिल्ला समन्वय समिति बाँकेको प्रमुखमा ज्ञानेन्द्र कुमार चौधरी र उमेश कुमार कुर्मीको उम्मेदवारी परेको छ । चौधरी नेपाली कांग्रेसका हुन् भने कुर्मी जनता समाजवादी पार्टी (जसपा) नेपालका हुन् । उपप्रमुखमा नेपाली कांग्रेसकी सीता कार्कीको मात्र उम्मेदवारी दर्ता भएको छ । एकल उम्मेदवारी परेपछि कार्की निर्विरोध भएकी छिन् । चौधरी यसअघि जिल्ला समन्वय समितिमा उपप्रमुख थिए । उनी डुडुवा १ का हुन् । कुर्मी जानकी ३ का हुन् भने कार्की कोहलपुर ५ की हुन् ।

यस्तै दलित/अल्पसंख्यक सदस्यमा पनि निर्विरोध भएको छ । नेपालगञ्ज २ का जगदिश बाल्मिकी निर्विरोध भएका छन् । खुला सदस्य पनि तीन जना नै निर्विरोध भएका छन् । नेपालगञ्ज ५ का उदय नारायण मिश्र, जानकी ५ का जुल्फेकार अली मनिहार र कोहलपुर १५ का सन्त कुमार थारु निर्विरोध भएका छन् । तीन जना नै कांग्रेसका हुन् । तीन जना महिला सदस्यका लागि भने चार जनाको उम्मेदवारी परेको छ । जसपाबाट नेपालगञ्ज ५ की तरुन्नुम बानो शेष र जानकी ३ की लक्ष्मी पासी तथा माओवादी केन्द्रबाट नेपालगञ्ज ४ की रेवती दमाई र नेकपा एकीकृत समाजवादीबाट बैजनाथ ५ की चमेली थरुनीको उम्मेदवारी परेको छ । जिल्ला समन्वय समितिको निर्वाचन जेठ २७ गते छ । प्रमुख र महिला सदस्यमा उम्मेदवारी फिर्ता नभए चुनाव हुनेछ । उम्मेदवारी फिर्ताको समय भोली दिउँसो १ बजेदेखि ३ बजेसम्म तोकिएको छ ।

जिल्ला समन्वय समितिमा कांग्रेसको स्पष्ट बहुमत छ । तर, स्थानीय चुनावमा गठबन्धनमा रहेका सत्तारुढ दलहरुलाई समेट्ने उद्देश्यका साथ कांग्रेसले अरु दलहरुलाई पनि सदस्य दिएको हो । कांग्रेसले नेकपा माओवादी केन्द्र, जनता समाजवादी पार्टी र नेकपा एकीकृत समाजवादीलाई १/१ जना महिला सदस्य दिएकोमा जसपा त्यसमा सहमत नभएपछि प्रमुख र महिला सदस्यमा उम्मेदवारी दर्ता गराएको हो । १६ जना मतदाता मध्ये कांग्रेसका मात्रै १२ जना छन् । जनता समाजवादी पार्टीका ३ जना र माओवादीका १ जना छन् । यसमा पालिका प्रमुख र उपप्रमुख मतदाता हुन्छन् ।

गाउँपालिका र नगरपालिकामा निर्वाचित प्रमुख, उपप्रमुख, वडा अध्यक्ष र सदस्यहरु समेत जिल्ला समन्वय समिति प्रमुखमा उम्मेदवार हुन पाउँछन् । जिल्ला समन्वय समितिको प्रमुख र उपप्रमुख चुनिनका लागि मतदान भने गाउँपालिका अध्यक्ष र उपाध्यक्ष तथा नगरपालिकाका प्रमुख र उपप्रमुखले मात्रै गर्न पाउँछन् ।

जिल्ला समन्वय समितिमा प्रमुख र उपप्रमुख सहित ९ सदस्य निर्वाचित हुन्छन् । समितिमा तीन सदस्य महिला अनिवार्य हुने व्यवस्था छ । स्थानीय तह निर्वाचन ऐन २०७३ अनुसार गाउँपालिका र नगरपालिकामा निर्वाचित प्रमुख, उपप्रमुख, वडा अध्यक्ष र सदस्यहरु समेत जिल्ला समन्वय समितिमा उम्मेदवार हुन पाउँछन् ।

अन्य तीन जना सदस्यहरु गाउँपालिका र नगरपालिकाबाट निर्वाचित सदस्यहरुबाट उम्मेदवार भएर आउँछन् । उनीहरु पनि जिल्ला समन्वय समितिका प्रमुख र उपप्रमुख जस्तै गरी निर्वाचित हुनुपर्ने ऐनमा व्यवस्था छ ।

जिल्ला समन्वय समिति गठन भएपछि जिल्ला सभा गठन हुनेछ । जिल्ला सभाको प्रमुख र उपप्रमुखमा जिल्ला समन्वय समितिकै प्रमुख र उपप्रमुख हुनेछन् भने गाउँपालिका र नगरका प्रमुख उपप्रमुखहरु पदेन सदस्य हुनेछन् ।

प्रकाशित मिति: बुधबार, जेठ २५, २०७९ १६:०४