दाङमा अन्तर कलेज पुरुष भलिबल सुरु, पूर्व मन्त्री गिरीद्वारा उद्घाटन

खेलकुद

गृहपृष्ठ
खेलकुद
दाङमा अन्तर कलेज पुरुष भलिबल सुरु, पूर्व मन्त्री गिरीद्वारा उद्घाटन

दाङमा अन्तर कलेज पुरुष भलिबल सुरु, पूर्व मन्त्री गिरीद्वारा उद्घाटन

खेलकुदको विकास स्थानीय स्तरबाटै हुनुपर्छः गिरी

मंगलबार, साउन १०, २०७९ बागेश्वरी पोस्ट

दाङ । दाङको तुलसीपुरमा आजदेखि अन्तर कलेज स्तरीय खुला पुरुष भलिबल प्रतियोगिता सुरु भएको छ । राप्ती किङ्ग भलिबल प्रशिक्षण केन्द्र तुलसीपुर दाङको आयोजना तथा दाङ जिल्ला भलिबल संघको समन्वयमा संचालित प्रतियोगिता तथा प्रशिक्षण केन्द्रको पूर्व सिंचाई मन्त्री एवं नेपाली कांग्रेसका केन्द्रीय सदस्य दिपक गिरीले उद्घाटन गरे ।

No description available.

उद्घाटन समारोहलाई सम्बोधन गर्दै कार्यक्रमका प्रमुख अतिथि गिरीले खेलकुदको विकास स्थानीय स्तरबाटै हुनुपर्ने बताए । "मानव समाज र अनुशासनको मुख्य मेरुद्दण्ड खेलकुद हो, यसको विकास स्थानीय स्तरमै हुनुपर्छ, अव स्थानीय तह पनि सिंगो खेलकुदको विकासमा जुट्न आवश्यक छ," गिरीले भने । एउटा पूर्व खेलाडीको अनुभव सेयर गरेका गिरीले खेल विकासमा आफू लागिपर्ने बताए ।

No description available.

कार्यक्रमका विशिष्ट अतिथि लुम्बिनी प्रदेश खेलकुद परिषद्का सदस्य सचिव जयप्रकाश भट्टराईले खेलकुदको विकासमा स्थानीय सरकार गम्भीर नभएको बताए । निजी क्षेत्र खेलकुद क्षेत्रमा लगानी गर्न इच्छुक भइरहँदा स्थानीय निकायले खेल क्षेत्रलाई हेर्ने दृष्टिकोण फराकिलो बनाउन नसकेको उनले बताए ।

प्रशिक्षण केन्द्रका अध्यक्ष कमल खत्रीको अध्यक्षतामा भएको कार्यक्रममा तुलसीपुर उपमहानगरपालिका वडा नम्बर ६ का अध्यक्ष दुजमान भण्डारी, दाङ जिल्ला खेलकुद विकास समितिका कोषाध्यक्ष ध्रुब आचार्य, लुम्बिनी प्रदेश भलिबल संघका अध्यक्ष देवेन्द्र बैरागी लगायतले शुभकामना मन्तव्य ब्यक्त गरेका थिए । राप्ती किङ्ग प्रशिक्षण केन्द्रका सल्लाहकार केदारराज श्रेष्ठको स्वागत रहेको कार्यक्रमको संचालन खेल पत्रकार लक्ष्मण बस्नेतले गरेका थिए ।

यसैबीच प्रशिक्षण केन्द्रको आफ्नै खेल मैदानमा संचालित प्रतियोगिताको आज पहिलो दिन अरनिको मावि रोल्पा, शिद्देश्वरी मावि रुपन्देही र मुसिकोट बहुमुखी क्याम्पस कलङ्गाले बिजयी सुरुवात गरेका छ्न् । यस्तै प्रतियोगिता अन्तरगत् भोली बुधबार बिहान ७ बजे न्यु होराइजन रुपन्देही र जनश्रम मावि खाद्रे भिड्नेछन् भने दोश्रो खेल भिमसेन मावि र गोरखा मावि ब्लुबीच हुनेछ ।

नेपालको राष्ट्रिय खेल भलिबलको विकास र प्रवर्द्धनसंगै प्रतिभावान खेलाडीको पहिचान र विकासमा टेवा पुर्‍याउने मुख्य उद्देश्यका साथ आयोजना गरिएको प्रतियोगितामा दाङ, बाँके, रुपन्देही, रुकुम पश्चिम, सल्यान र रोल्पा जिल्लामा स्थापित कलेजका २० टिमको सहभागिता रहेको छ । प्रतियोगिताको बिजेता टिमले नगद १ लाख १ हजार ११ रुपैयाँ, कप, मेडल तथा प्रमाणपत्र हात पार्नेछ ।

त्यस्तै उपविजेता र तृतीय स्थान हासिल गर्ने टिमले क्रमशः नगद ५० हजार १ सय ११ र २५ हजार, १ सय ११ रुपैयाँ, मेडल तथा प्रमाणपत्र हात पार्ने प्रतियोगिता मूल आयोजक समितिका सदस्य सन्तोष रानाले जानकारी दिए । प्रतियोगिता अवधिभर उत्कृष्ट खेल प्रदर्शन गर्ने ब्यक्तिगत बिधातर्फ खेलाडीलाई पुरस्कृत गरिनेछ । जस अनुसार सर्बोत्कृष्ट खेलाडी नगद ५ हजार, ट्रफी र प्रमाणपत्र, उत्कृष्ट सेटर, सर्बर, स्पाइकर र लिब्रोलाई जनही २ हजारका दरले नगद पुरस्कार तथा प्रमाणपत्र प्रदान गरिनेछ ।

प्रकाशित मिति: मंगलबार, साउन १०, २०७९ २०:४९

प्रतिक्रिया दिनुहोस्