अन्तर कलेज पुरुष भलिबलको उपाधि ज्ञानज्योतिलाई

खेलकुद

गृहपृष्ठ
खेलकुद
अन्तर कलेज पुरुष भलिबलको उपाधि ज्ञानज्योतिलाई

अन्तर कलेज पुरुष भलिबलको उपाधि ज्ञानज्योतिलाई

शनिबार, साउन १४, २०७९ बागेश्वरी पोस्ट

दाङ । दाङको तुलसीपुरमा सम्पन्न अन्तर कलेज पुरुष भलिबल प्रतियोगिता २०७९ को उपाधि ज्ञानज्योति कलेज तुलसीपुरले जितेको छ ।

राप्ती किङ्ग भलिबल प्रशिक्षण केन्द्र तुलसीपुर दाङको आयोजना तथा दाङ जिल्ला भलिबल संघको समन्वयमा सञ्चालित प्रतियोगिताको आज आज उल्लेख्य दर्शकको उपस्थितिमा भएको कडा प्रतिस्पर्धा अनि रोमाञ्चक फाइनल खेलमा न्यु होराइजन बोर्डिङ स्कुल बुटवल रुपन्देहीलाई १८-२५,२९-२७,१६-२५,२७-२५ र १५-१० अर्थात् ३-२ को सेटमा पराजित गर्दै ज्ञानज्योति कलेजले उपाधि जितेको हो ।

उपाधिसंगै उसले नगद एक लाख एक हजार एक सय एघार रुपैयाँ, कप, मेडल, प्रमाणपत्र हात पार्‍यो । फाइनलमा सम्मानजक हार ब्यहोरेको न्यु होराईजन उपविजेतामा सीमित रहँदै नगद पचास हजार एक सय एघार रुपैयाँ, मेडल प्रमाणपत्रमा चित्त बुझाउन बाध्य भयो । त्यस्तै प्रतियोगितामा मुसीकोट बहुमुखी क्याम्पस खलंगा रुकुम पश्चिम तृतीय भयो । उसले नगद पच्चीस हजार एक सय एघार रुपैयाँ हात पार्‍यो ।

प्रतियोगितामा ब्यक्तिगत बिधातर्फ सर्बोत्कृष्ट खेलाडी न्यु होराइजन बोर्डिङ स्कुल बुटवल रुपन्देहीका बबिन थापा भए । उनले नगद पाँच हजार, ट्रफी, मेडल र प्रमाणपत्र हात पारे । त्यस्तै वेस्ट सेटर ज्ञानज्योतिका सुदिप राना, वेस्ट लिबेरो ज्ञानज्योतिकै बिनोद बुढाथोकी, वेस्ट स्पाइकर होराइजनका राहुल चौधरी र वेस्ट कोच न्यु होराइजनकै उदय बम मल्ल घोषित भए । उत्कृष्ट सबैले जनही दुई हजार, मेडल तथा प्रमाणपत्र हात पारे । पाँच दिनसम्म सञ्चालन भएको प्रतियोगितामा लुम्बिनी प्रदेशका दाङ, बाँके, रुपन्देही, सल्यान र पश्चिम रुकुम जिल्ला कलेज गरी २० टिमको सहभागिता रहेको थियो ।

प्रतियोगिताको समापन समारोह आयोजक राप्ती किङ्ग भलिबल प्रशिक्षण केन्द्र तुलसीपुरका अध्यक्ष कमल खत्रीको अध्यक्षता तथा नेपाली कांग्रेस तुलसीपुर नगर सभापति सुरेश हमालको प्रमुख आतिथ्य एवं तुलसीपुर उपमहानगरपालिका वडा नम्बर १० का अध्यक्ष यम बहादुर केसी र लुम्बिनी प्रदेश भलिबल संघका अध्यक्ष देवेन्द्र सिंह बैरागीको विशिष्ट आतिथ्यतामा भएको थियो ।

सो अबसरमा प्रतियोगितालाई भब्य एवं सभ्य बनाउन महत्त्वपूर्ण सहयोग पुर्‍याउने संघसंस्था, ब्यक्ति तथा रास्ट्रीय राष्ट्रपति रनिङ शिल्ड प्रतियोगिता २०७९ मा एथलेटिक्सतर्फ राष्ट्रिय कीर्तिमान कायम गर्न सफल निशा चौधिरी, सहभागी बब्लु वली, भलिबलतर्फ खेलाडी मोनिका बिष्ट, सीता वली र रुपा थापा, त्यस्तै बिजेता, उपबिजेता टिम तथा खेलाडी, कार्यक्रमका प्रमुख अतिथी, विशिष्ट अतिथिले पुरस्कार तथा कप, मेडल प्रमाणपत्र प्रदान गरेका थिए । कार्यक्रमको संचालन खेल पत्रकार लक्ष्मण बस्नेतले गरेका थिए ।

प्रकाशित मिति: शनिबार, साउन १४, २०७९ १७:१६

प्रतिक्रिया दिनुहोस्