सांसद भण्डारीको पहिलो शल्यक्रिया सफल

स्वास्थ्य

गृहपृष्ठ
स्वास्थ्य
सांसद भण्डारीको पहिलो शल्यक्रिया सफल

सांसद भण्डारीको पहिलो शल्यक्रिया सफल

शुक्रबार, फागुन ५, २०७९ बागेश्वरी पोस्ट

फाइल फोटो

नेपालगन्ज । ग्यास सिलिन्डर विष्फोट भएर आगलागी हुँदा जलेर गम्भीर घाइते भएका नेपाली कांग्रेसका सांसद डा. चन्द्र भण्डारीको भारतको मुम्बईस्थित नेशनल बर्नस् सेन्टरमा पहिलो शल्यक्रिया सफल भएको छ ।

उनको आज दुई वटा शल्यक्रिया हुँदैछ । पहिलो शल्यक्रिया सफल भएको उनका पूर्व स्वकीय एवं त्रिचन्द्र क्याम्पसका लेक्चरर माधव न्यौपानेले जनाएका छन् । दुई वटा खुट्टाको शल्यक्रिया सफल भएको उनले जनाए ।

दायाँ खुट्टामा बायाँको तुलनामा गहिरो घाउ रहेको छ । दोस्रो शल्यक्रियाबारे चिकित्सकहरुबीच छलफल भइरहेको उनले बताए । स्वास्थ्य अवस्था स्थिर रहेको पनि उनले जनाए ।

गत बुधबार राति घरमा ग्यास लिक भएर आगलागी हुँदा जलेका भण्डारीको ३० प्रतिशत शरीरको भाग जलेको बताइएको छ । कीर्तिपुरस्थित बर्न अस्पतालमा उनको उपचार भएकामा हिजो बिहान चिकित्सकको टोलीले थप उपचार नेपालमा सम्भव नहुने बताएसँगै श्रीएयरलाइन्सको विमान चार्टर्ड गरेर डा. भण्डारीलाई मुम्बई लगिएको थियो ।

सो घटनामा जलेकी उनकी आमाको भने निधन भएको छ । हिजो निधन भएकी उनको आज दाहसंस्कार गरिएको छ ।

प्रकाशित मिति: शुक्रबार, फागुन ५, २०७९ १५:२२