प्रदेश १ लाई 'कोशी' नाम राख्ने प्रस्ताव कांग्रेसद्वारा फिर्ता

राजनीति

गृहपृष्ठ
राजनीति
प्रदेश १ लाई 'कोशी' नाम राख्ने प्रस्ताव कांग्रेसद्वारा फिर्ता

प्रदेश १ लाई 'कोशी' नाम राख्ने प्रस्ताव कांग्रेसद्वारा फिर्ता

बुधबार, फागुन १७, २०७९ बागेश्वरी पोस्ट

नेपालगन्ज । प्रदेश नम्बर १ को नाम 'कोशी' राख्न यसअघि प्रदेशसभा बैठकमा दर्ता भएको प्रस्तावमा नेपाली कांग्रेसले समर्थन फिर्ता लिएको छ । प्रदेश नम्बर १ को नामकरण प्रक्रिया अगाडि बढेसँगै आज बिहान प्रदेशसभामा प्रतिनिधित्व गर्ने दलहरूले प्रदेश नम्बर १ को नाम तोक्न प्रदेशसभा सचिवालयमा नाम दर्ता गराएपछि प्रक्रिया अगाडि बढेको हो ।

प्रदेश नम्बर १ का प्रमुख प्रतिपक्षी दल नेपाली कांग्रेस र सत्तारुढ दल नेकपा एमालेले संयुक्तरूपमा प्रदेशको नाम ‘कोशी प्रदेश’ राख्न प्रदेशसभा सचिवालयमा प्रस्ताव दर्ता गराएका थिए । यो प्रस्तावमा एमालेका प्रदेश सांसद रामबहादुर मगर प्रस्तावक र कांग्रेसका भूमिकाप्रसाद राजवंशी र एमालेका निरन राई समर्थक रहेका थिए । प्रस्ताव दर्ता भएको केही घन्टापछि कांग्रेसका राजवंशीले प्रदेशसभा सचिवालयमा आफ्नो समर्थन फिर्ता भएको निवेदन दिएका छन् ।

यस्तै प्रतिपक्षी दल नेकपा (एकीकृत समाजवादी) र सत्तारुढ दल जनता समाजवादी पार्टी (जसपा) ले संयुक्त रूपमा ‘किराँत–लिम्बुवान–सगरमाथा प्रदेश’ नामाकरणका लागि प्रस्ताव दर्ता गराएका छन् ।

यो प्रस्तावको प्रस्तावकमा एकीकृत समाजवादीका नेता एवं पूर्व मुख्यमन्त्री राजेन्द्रकुमार राई र स्वास्थ्यमन्त्री तथा जसपाकी प्रदेश सांसद निर्मला लिम्बु र एकीकृत समाजवादीका कमलप्रसाद जबेगु समर्थक रहेका छन् ।

प्रस्तावक राईले सुरूमा माओवादी केन्द्रका नेता इन्द्रबहादुर आङ्बाले छुट्टै प्रस्ताव दर्ता गराउने सहमति गरे पनि पछि पन्छिएको आरोप लगाएका छन् । प्रदेश नम्बर १ का सभामुख बाबुराम गौतमले प्रदेस नामकरणका लागि प्रदेशसभा सचिवालयमा प्रस्ताव दर्ताका लागि आह्वान गरेका हुन् ।

पहिलो प्रदेशसभाले थाँती राखेर गएको प्रदेश नम्बर १ को नामाकरण बुधबार बस्ने प्रदेशसभामा प्रस्ताव गरेर पारित गर्ने कार्यसूची सार्वजनिक गरिएको छ । प्रदेशको नामाकरणका लागि प्रदेशसभामा कायम रहेका दुई तिहाइ सांसदको समर्थन हुनुपर्ने संवैधानिक व्यवस्था छ । त्यो हिसाबले दर्ता भएका दुई मध्ये कुनै नाम पारित हुने ६३ सांसदको समर्थन आवश्यक हुन्छ ।

प्रदेशसभामा एमालेका ४०, कांग्रेसका २९, माओवादीका १३, राप्रपाका ६, एकीकृत समाजवादीका ४ र जसपाका १ सांसद छन् ।

प्रकाशित मिति: बुधबार, फागुन १७, २०७९ १४:२६