स्ववियु सभापति पदकी उम्मेदवार टिका शाही को हुन् ?

राजनीति

गृहपृष्ठ
राजनीति
स्ववियु सभापति पदकी उम्मेदवार टिका शाही को हुन् ?

स्ववियु सभापति पदकी उम्मेदवार टिका शाही को हुन् ?

मंगलबार, फागुन ३०, २०७९ बागेश्वरी पोस्ट

नेपालगन्ज । विश्वमा भएका सम्पूर्ण परिवर्तनको अगुवाई कुनै न कुनै रुपमा महिलाहरुले गरेका छन् । नेपालमा भएका राजनैतिक, सामाजिक र आर्थिक परिवर्तनमा महिलाहरुको महत्वपूर्ण योगदान रहेको छ । लोककल्याणकारी राज्य व्यवस्थामा महिलाहरु शासकीयरुपमा प्रमुख पदमा आफूलाई स्थापित गरिरहेको अवस्था छ । राष्ट्रपतिदेखि, सभामुख, प्रधान न्यायाधीश, संवैधानिक निकायका प्रमुखका रुपमा महिलाहरु आफ्नो क्षमता प्रस्तुत गरिरहेकी छन् । इतिहास निर्माण गर्नेहरुलाई भावी पुस्ताले आफ्नो आदर्शका रुपमा लिने गर्दछन् ।

बाँकेको कोहलपुरमा रहेको बागेश्वरी बहुमुखी क्याम्पसमा चैत्र ३ गते हुन गइरहेको निर्वाचनका लागि क्याम्पसको इतिहासमा पहिलोपटक महिलाले सभापति पदमा प्रतिस्पर्धा गर्दैछिन् टिका शाहीले । नेपालको कर्णाली प्रदेशको जल, जमिन र जंगलले भरिपूर्ण दैलेख जिल्लाको चामुण्डा बिन्द्रसैनी नगरपालिका वडा नं. २ मा बुवा महारुप शाही र आमा नामदेवी शाहीको कोखबाट जन्मलिएकी हुन् टिका शाही । शाहीका तीन जना दाई र पाँच जना दिदीबिहिनी रहेकोमा उनी माइली हुन् । शाही एक समान्य परिवारमा जन्मेहुर्केकी छोरी हुन् । उनका बुवा कृषि पेशामा आवद्ध छन् ।
शाहीको शिक्षा
स्ववियु सभापति पदकी उम्मेदवार शाहीले आफ्नो अध्ययन कक्षा १ देखि ३ सम्म श्री भैरब निम्न माध्यामिक विद्यालय हाडाकोट तोल्पा दैलेख, कक्षा ४ देखि ८ सम्म अध्ययन श्री भैरब निम्न माध्यायिक विद्यालय बास्ठाना दैलेख, कक्षा ९ देखि १२ सम्म श्री चामुण्डा उच्च माध्यामिक विद्यालय हाडाकोट दैलेखबाट अध्ययन पूरा गरेकी हुन् । शाही हाल बागेश्वरी बहुमुखी क्याम्पस कोहलपुरमा स्नातक सातौं सेमेष्टरमा शिक्षाशास्त्र संकायमा अध्ययन गरिरहेकी छिन् ।

राजनीतिक यात्रा
शाहीले आफ्नो राजनीतिक यात्रा विद्यालय तहबाटै सुरु गरेपनि सक्रिय विद्यार्थी राजनीति भने नेपाल विद्यार्थी संघ बागेश्वरी बहुमुखी क्याम्पस कोहलपुरको कक्षा कमिटीको उपाध्यक्षबाट गरेकी हुन् । २०७५ सालमा नेपाल विद्यार्थी संघ बागेश्वरी बहुमुखी क्याम्पस इकाई कार्यसमितिको सम्मेलनबाट सदस्य पदमा निर्वाचित भएकी थिइन् । नेविसंघको सदस्य हुँदै उनले विद्यार्थीहरुका हक र अधिकारीका निम्ति निरन्तर रुपमा संघर्ष गरिरहेकी लोकप्रिय विद्यार्थी नेताका रुपमा स्थापित भएकी छिन् । यसका साथै उनी सामाजिक संस्थाहरुमा आवद्ध समेत रहेकी छिन् । शाही हाल कोहलपुर जेसिजको कार्यकारी उपाध्यक्षको भूमिकामा छिन् । कोहलपुर जेसिजका माध्यमबाट उनले सामाजिक रुपान्तरणका कार्यहरु गरिरहेकी छिन् । कोरोना महामारीको बेला उनले विद्यार्थीहरुले भोग्दै आएका समस्यालाई कोहलपुर जेसिजको माध्यमबाट सहयोग गरेकी थिइन् ।

अबको लक्ष्य
चैत्र ३ गते हुन गइरहेको स्वतन्त्र विद्यार्थी युनियानको निर्वाचनमा नेपाल विद्यार्थीको संघको तर्फबाट सभापति पदको उम्मेदवारका रुपमा टिका शाहीलाई अगाडि सारिएको छ । विगतदेखि विद्यार्थीहरुका बीचमा लोकप्रिय बन्दै आएकी शाही यसपटक बागेश्वरी क्याम्पसको स्ववियू सभापतिमा निर्वाचित हुने निश्चित जस्तै देखिएको छ । क्याम्पसमा अध्ययनरत विद्यार्थीहरु अधिकांश महिलाहरु अध्ययन गरिरहेको र विद्यार्थीहरुको बीच चिरपरिचित भएकाले शाहीको बिजय निश्चित जस्तै भएको हो । शाहीले क्याम्पसमा छात्राले भोग्दै आएका समस्या, छात्रवृत्ति, ई–पुस्ताकायल, प्रविधिमैत्री शिक्षा, खेलमैदान निर्माण, विज्ञान विषयसँगै प्रयोगशाला निर्माण र गुणस्तरीय शिक्षा प्रमुख लक्ष्य रहेको बताएकी छिन् । साथै उनले क्याम्पसलाई शैक्षिक हबका रुपमा विकास गर्नका लागि स्थानीय सरकार, प्रदेश सरकार, संघिय सरकार र क्याम्पस प्रशासनसँग सहकार्य गरी काम गर्ने प्रतिवद्धता जनाएकी छिन् ।

प्रकाशित मिति: मंगलबार, फागुन ३०, २०७९, २२:०१:००

प्रतिक्रिया दिनुहोस्