लुम्बिनीमा मन्त्रीपरिषद् विस्तार हुँदै

राजनीति

गृहपृष्ठ
राजनीति
लुम्बिनीमा मन्त्रीपरिषद् विस्तार हुँदै

लुम्बिनीमा मन्त्रीपरिषद् विस्तार हुँदै

आइतबार, असोज २४, २०७८ बागेश्वरी पोस्ट

नेपालगञ्ज । लुम्बिनी प्रदेशमा मन्त्रीपरिषद् आज विस्तार हुँदैछ। सत्ता साझेदार नेपाली कांग्रेसले मन्त्रीपरिषद्मा सहभागी हुने मन्त्रीहरूको नाम टुंग्याएपछि मुख्यमन्त्री कुलप्रसाद केसीले आज मन्त्रीपरिषद् विस्तार गर्ने तयारी गरेका हुन् ।

नेपाली कांग्रेसले आज मन्त्री हुनेको नाम टुंग्याएपछि मन्त्रीपरिषद् विस्तार हुन लागेको हो । नेकपा माओवादी केन्द्र र नेकपा एकीकृत समाजवादीले यसअघि नै मन्त्रीको नाम टुंग्याइसकेका छन्। प्रदेश प्रमुखको कार्यालयले दिउँसो ३ बजे सपथको तयारी गरेको छ ।

नेपाली कांग्रेसले यसअघि नै वन वातावरण तथा भूसंरक्षण मन्त्रीमा बाँकेका सुरेन्द्र हमाल र शिक्षा विज्ञान युवा तथा खेलकुद मन्त्रीमा रूपन्देहीका बसिउद्धिन खाँलाई पठाउने निर्णय गरिसकेको थियो ।

त्यसबाहेक आज ऊर्जा जलस्रोत तथा सिंचाई मन्त्रीका लागि पाल्पाका वीरबहादुर रानालाई पठाउने निर्णय गरिएको छ । त्यसबाहेक राज्यमन्त्रीमा पनि निर्णय भइसकेको बताइएको छ । राज्यमन्त्रीमा कपिलबस्तुकी रीना नेपाल र दाङका अर्जुन श्रेष्ठले सपथ लिने तयारी छ ।

नेकपा माओवादी केन्द्रले भने यसअघि नै सरकारमा सहभागी हुने दुई मन्त्री र एक राज्यमन्त्रीको टुंगो लगाएको थियो । दाङका इन्द्रजीत थारु र बर्दियाका तिलकराम शर्मालाई मन्त्रीपरिषद्मा पठाउने निर्णय माओवादीले गरेको थियो । माओवादीबाटै दाङकी विमला वली राज्यमन्त्री बन्नेछिन् ।

माओवादी केन्द्रले मुख्यमन्त्री, आर्थिक मामिला तथा सहकारी, सञ्चार, कानुन महिला बालबालिका तथा ज्येष्ठ नागरिक र स्वास्थ्य जनसंख्या तथा परिवार कल्याण मन्त्रालय पाएको छ । उसले पाएका चार मन्त्रालय मध्ये एक मन्त्रालय समाजवादीलाई दिएर मन्त्रीपरिषद् विस्तार गर्न लागेको मुख्यमन्त्री सचिवालयले जनाएको छ । नेकपा समाजवादीबाट एक मात्र सांसद् पाल्पाकी रमा घर्ती पनि सरकारमा सहभागी हुनेछिन् ।

१३ मन्त्रालय रहेको लुम्बिनीमा यसअघि मुख्यमन्त्रीसहित माओवादीका २, कांग्रेसका एक, जसपाका ३ र स्वतन्त्र एक गरी ७ सदस्यीय मन्त्रीपरिषद् गठन भएको थियो ।

जसपाले भौतिक पूर्वाधार, श्रम रोजगार तथा यातायात, कृषि खाद्य प्रविधि तथा भूमि व्यवस्था पाएको छ । स्वतन्त्र सांसद् अजय शाही उद्योग वाणिज्य तथा आपूर्तिमन्त्री छन् ।

एमाले नेता शंकर पोखरेलको सरकार अल्पमतमा पर्दै ढलेपछि साउन २८ गते माओवादी केन्द्रका कुलप्रसाद केसी 'सोनाम' पाँच दलीय गठबन्धनको सहारामा मुख्यमन्त्री बनेका थिए ।

प्रकाशित मिति: आइतबार, असोज २४, २०७८ १४:३३

प्रतिक्रिया दिनुहोस्