कार्यालय समयमा अध्यक्षलाई नपाएपछि सुर्खेतको वडा कार्यालयमा आगजनी

सुरक्षा-अपराध

गृहपृष्ठ
सुरक्षा-अपराध
कार्यालय समयमा अध्यक्षलाई नपाएपछि सुर्खेतको वडा कार्यालयमा आगजनी

कार्यालय समयमा अध्यक्षलाई नपाएपछि सुर्खेतको वडा कार्यालयमा आगजनी

बुधबार, असोज ६, २०७८ बागेश्वरी पोस्ट

नेपालगन्ज । वडा कार्यालयमा समयमा वडा अध्यक्ष नआएको भन्दै एक जना युवाले वडा कार्यालयमा आगजनी गरेका छन् ।आज बिहान १० बजे सम्म वडा अध्यक्षलाई कार्यालय नपाएपछि सुर्खेतको वीरेन्द्रनगर नगरपालिका १ को वडा कार्यालयको अध्यक्ष गंगाराम सुनारको कार्यकक्षमा आगजनी गरिएको हो । ती युवाले वडा अध्यक्ष कार्यालय समयमा नआएको भन्दै आगजनी गरेको बिरेन्द्रनगर नगरपालिकाका मेयर देबकुमार सुबेदीले जानकारी दिएका छन् ।

'आज बिहान कोपिला भ्यालि स्कुलको कार्यक्रम भएका कारण आफू त्यहाँ अतिथिका रूपमा गएको र १० बजेर ४ मिनेटमा आफ्नै अफिसकै ल्यान्डलाइनबाट फोन आयो,’ अध्यक्ष सुनारले भने, ‘उहाँले कार्यालय समय भयो तपाईं किन आउनुभएन भनेर सोध्नुभयो, मैले म कार्यक्रममा भएकोले तपाइको जे काम भएपनी कार्यवाहक वडाध्यक्ष आएर गर्नुहुन्छ भनेको थिएँ । पछि त ती युवाले पेट्रोल पम्पबाट पेट्रोल ल्याएर मेरो कार्यकक्षमा जलाइसकेछन्।'

वडाध्यक्ष सुनारका अनुसार महिला वडा सदस्य बुद्धिसरा सुनार कार्यवाहक वडा अध्यक्ष छन् । आफूले नै गर्नुपर्ने काम भए पनि केही समय कुर्न भनेको उनले बताए । अध्यक्ष सुनार आगजनी गर्ने ती युवाविरूद्ध जिल्ला प्रहरी कार्यालयमा जाहेरी दिने तयारी गरिएको छ । अध्यक्ष सुनारका अनुसार कार्यकक्षका कुर्ची, टेबुल, सोफालगायत सबै सामान र कागजात जलेका छन् । राजश्व फाँट र कम्प्युटर कक्षका विद्युतीय तार काम नलाग्ने गरी जलेका छन् । आगजनी गर्ने ती युवा अहिले सम्म पक्राउ परेका छैनन् । प्रहरीले उनको खोजीकार्य जारी राखेको छ ।

प्रकाशित मिति: बुधबार, असोज ६, २०७८ १६:३७