नारीहरु पुरुष सरह स्वतन्त्र हुन जरुरी छ

बिचार

गृहपृष्ठ
बिचार
नारीहरु पुरुष सरह स्वतन्त्र हुन जरुरी छ

नारीहरु पुरुष सरह स्वतन्त्र हुन जरुरी छ

मंगलबार, फागुन २४, २०७८ बागेश्वरी पोस्ट

शोभा सुवेदी केसी

हरेक बर्ष मार्च ८ का दिनमा बिश्वभरी महिलाहरुको सम्मानमा अन्तर्राष्ट्रिय नारी दिवस मनाइन्छ । आजको दिन नारीको त्याग र समाजप्रतिको वलिदानका लागि महिलाहरुलाई प्रेम, प्रशंसा, आदर र सम्मान गर्ने दिनका रुपमा संसारभर विभिन्न कार्यक्रमको आयोजना गरी मनाउने गरिँदै आइएको छ ।

नारीहरु पहिला छोरी अनि पछि दिदि-बहिनी, श्रीमती, बुहारी, आमा र हजुरआमा आदिका रुपमा आफ्नो हरेक इच्छा आकांंक्षाहरुलाई पछि सारेर परिवारको उन्नतिका लागि हरपल प्रयासरत रहन्छन् । घरपरिवार लगायत समाजका साथै राष्ट्रको प्रगतिमा नारीले सधैं महत्त्वपूर्ण भूमिका निभाउंदै आएका छन् ।

तर, परापूर्वकालदेखि नै बिश्वभर नारीहरु सधैं पछाडि पर्दै आएको देखिएको छ ।

नेपालको सन्दर्भमा हेर्ने हो भने महिलाहरुको अवस्था अत्यन्त दयनीय छ । जनसंख्याको आधारमा आधा भन्दा बढी संख्या ओगटेका नारीहरु अझै पनि दाइजो प्रथा, घुम्टो प्रथा, बिधवा प्रथा, छाउपडी प्रथा आदि जस्ता कुरितीहरु झेल्न बाध्य र बिवश हुँदै आएका छन् । नेपालको परिस्थितिलाई हेर्ने हो भने धेरैजसो महिलाहरु अझै पनि भात-भान्सा मेलापात, घाँस-दाउरामै सीमित रहँदै आएका छन् ।

तर पनि समय र परिस्थितिसँगै समाज परिवर्तन हुँदै आएको छ । समय परिवर्तनसँगै सती प्रथा जस्तो अमानवीय प्रथाहरु र सधैँ बिधवा भनेर समाजलाई परिचय दिइरहनु पर्ने प्रथाहरु उन्मूलन भई बिस्तारै महिलाहरुको स्थितिमा सुधार आएर छोरीहरु पनि विद्यालय जाने र शिक्षा हासिल गर्ने अवसर पाइएको छ । उच्च शिक्षाका लागि विदेश वा स्वदेशमै पठनपाठन गरिरहेको अवस्था रहँदै आएको पनि छ ।

चुलो-चौकाको काममा मात्र सीमित नरही बाहिर अथवा विभिन्न सेवाका कार्यालयको कार्यहरु पनि गर्न महिलाहरु अहिले सक्षम हुँदै आएका छन् ।

यसकारण, आजका महिला आश्रित नारी नभई सबै काम गर्न सक्षम, सबल, स्वतन्त्र र आत्मनिर्भर भएर अगाडि बढेको अवस्था छ । विभिन्न ठाउँहरुमा रहेका महिलाहरुभित्र लुकेका प्रतिभाहरु बिस्तारै अगाडि आइरहेका छन् । विश्व कीर्तिमानी कार्यहरु सफलताका साथ गर्न सकिरहेका महिलाहरु समय परिवर्तनसँगै आफू पनि परिवर्तन हुँदै गएका छन् । यसो भन्नूपर्दा आजका महिलाहरु आफ्नो भबिष्य कोर्न आफैँ सक्षम बन्दै गएका छन् ।

विस्तारै-बिस्तारै विश्वभरी नै नारी उत्थानका लागि धेरै प्रशंसनीय तथा प्रभावकारी कदमहरु अघि बढिरहेको अवस्था छ ।

नेपालमा विभिन्न समयमा महिला अधिकारका लागि सकारात्मक गोरेटाहरु अगाडि बढेका छन् । तर, अझै पनि धेरै गर्न बाँकि छ ।

चेलीबेटी बेचबिखन, बलात्कार, हत्या, घरेलु हिंसा र सामाजिक कुरितीहरुलाई सकेसम्म चाँडो उन्मूलन गर्न जरुरी देखिन्छ ।

नारी दिवसको दिनमा मात्र नारा-जुलुस गरेर हामी नारीहरुको उत्थान कहिले हुँदैन । स्वदेश र विश्वभर घर-घरबाट नारीहरु पुरुष सरह स्वतन्त्र हुन जरुरी छ । आबश्यकतामा मात्र निर्भर भएर सफलताका लागि कदम उठाउन सक्नु आजको नारीहरुको मुख्य उद्देश्य हो । यति मात्रै नभई नारी-पुरुषहरुको छुट्टाछुट्टै अधिकारको अन्त्य भएमा मात्र नारीको सम्मान हुन्छ । सबैलाई नारी दिवसको शुभकामना ।

शोभा सुवेदी केसी/नेपालगन्ज

प्रकाशित मिति: मंगलबार, फागुन २४, २०७८ १८:४१

प्रतिक्रिया दिनुहोस्