कोहलपुरको संकल्पः सबै विद्यालयलाई भौतिक पूर्वाधार र शिक्षकका हिसावले अभावमुक्त

स्थानीय

गृहपृष्ठ
स्थानीय
कोहलपुरको संकल्पः सबै विद्यालयलाई भौतिक पूर्वाधार र शिक्षकका हिसावले अभावमुक्त

कोहलपुरको संकल्पः सबै विद्यालयलाई भौतिक पूर्वाधार र शिक्षकका हिसावले अभावमुक्त

सोमबार, कात्तिक २१, २०७९ बागेश्वरी पोस्ट

कोहलपुर । कोहलपुर नगरपालिकाले अबको पाँच वर्षभित्र नगरभित्रका सबै विद्यालयहरुलाई भौतिक पूर्वाधार र शिक्षक एवम् कर्मचारीका हिसावले अभावमुक्त बनाउने संकल्प लिएको छ । ‘गुणस्तरीय शिक्षाका लागि पर्याप्त लगानी, पूर्वाधार र संरचना, पश्चिम नेपालकै शैक्षिक हवको रुपमा हाम्रो नगरको स्थापना’ भन्ने मुख्य थिमसहित अबको पाँच वर्षमा नगरपालिकालाई शिक्षामा नमूना कोहलपुर बनाउने संकल्प लिएको हो ।

दुई दिनसम्म कोहलपुरका सामुदायिक विद्यालयका प्रअ तथा विद्यालय व्यवस्थापन समितिका अध्यक्षहरुसँगको क्षमता विकास तालिममा नगरपालिकाले पाँच वर्षभित्र गर्नुपर्ने २५ बुँदे प्रतिबद्धतापत्र सार्वजनिक गरेको हो । उक्त योजनामा नगरपालिका स्तरीय आवधिक शिक्षा योजना निर्माण गरी कार्यान्वयनमा ल्याउने, नगरपालिका स्तरीय शिक्षा ऐन र नियमावली आवश्यकता अनुसार संशोधन एवम् प्रभावकारीरुपमा कार्यान्वयन गर्ने कुरालाई पनि समेटिएको छ । ‘विद्यालयलाई ध्रुमपान, मध्यमान, लागु औषध र जङ्कफुट निषेधित क्षेत्रको रुपमा विकास गरिने छ,' प्रतिबद्धता पत्र सार्वजनिक गर्दै नगरप्रमुख पुर्णप्रसाद आचार्यले भने–‘विद्यालयलाई राजनीतिक हस्तक्षेप एवम् आग्रह पूर्वाग्रहको हिसावले मुक्त क्षेत्रको रुपमा विकास गरिनेछ ।’

विद्यालय व्यवस्थापन समितिको सिफारिसको आधारमा योग्य तथा सक्षम शिक्षकलाई प्रधानाध्यापक बनाउने र प्रधानाध्यापकसँग करार सम्झौता गरी सोही आधारमा स्वतन्त्र रुपमा काम गर्नका लागि सहयोग गरिने पनि नगर प्रमुख आचार्यले स्पष्ट पारेका छन् । ‘प्रधानाध्यापकका निम्ति उनीहरुले खाईपाई आएको तलवको निश्चित प्रतिशतको आधारमा प्रोत्साहन भत्ता थप गरिने छ,' उनले भने–‘उत्कृष्ट गर्ने प्रधानाध्यापकलाई पुरष्कृत गरिन्छ ।’

अब विद्यालयको अनुगमन विज्ञहरु सम्मिलित तेस्रो पक्षले गर्नेछ । ‘विज्ञहरु सम्मिलित तेस्रो पक्षबाट विद्यालयको अनुगमन गर्नका लागि संयन्त्रको विकास गरी अनुगमन कार्यलाई प्रभावकारी गराइने छ,' प्रतिबद्धतापत्रमा समेटिएको बिषयबारे जानकारी दिँदै नगर प्रमुख आचार्यले भने–‘अनुगमन प्रतिवेदनका आधारमा विद्यालयमा गर्नुपर्ने आवश्यक कारवाहीका लागि शूण्य सहनशीलताको साथ अघि बढिनेछ ।’

नगरपालिकाका शिक्षा शाखा प्रमुख रामबहादुर हमाल, नगरपालिकाका शिक्षा विज्ञ जितबहादुर शाह, नगरपालिकाका शिक्षा शाखा अधिकृत रबिलाल मिजार सहितको टिमले तयार पारेको नगरपालिकाको पञ्चवर्षीय शिक्षाका प्रतिबद्धतामा विद्यालयलाई प्रविधिको हिसावले साधन र स्रोत सम्पन्न बनाउनेदेखि स्मार्ट कक्षा संचालनका लागि योग्य कक्षा कोठाहरु निर्माण गर्नेसम्मको योजनालाई समेटिएको छ ।

त्यस्तै विद्यालय व्यवस्थापन समिति, प्रधानाध्यापक, शिक्षक र अभिभावकहरुको प्रतिबद्धतालाई समेत समेटिएको शाखा अधिकृत मिजारले बताए । उनीहरुका तर्फबाट पनि २५ बुँदे प्रतिबद्धता सार्वजनिक गरिएको छ । पहिलो चरणमा सामुदायिक विद्यालयसँग बसेर शैक्षिक गुणस्तरको उपाय खोजिएको बताउँदै नगरप्रमुख आचार्यले संस्थागत विद्यालयसँग पनि यस्तै छलफल गरेर कोहलपुरलाई शैक्षिक हवको रुपमा कसरी विकास गर्न सकिन्छ भन्ने बारे योजना बनाइने उल्लेख गरे ।

प्रकाशित मिति: सोमबार, कात्तिक २१, २०७९ १३:०७

प्रतिक्रिया दिनुहोस्