भ्रष्टाचारका उजुरी फस्र्यौट दर बढ्यो

स्थानीय

गृहपृष्ठ
स्थानीय
भ्रष्टाचारका उजुरी फस्र्यौट दर बढ्यो

भ्रष्टाचारका उजुरी फस्र्यौट दर बढ्यो

शनिबार, मंसिर २४, २०७९ बागेश्वरी पोस्ट

नेपालगञ्ज । भ्रष्टाचारका उजुरी फस्र्यौट दर बढेको छ । अख्तियार दुरुपयोग अनुसन्धान आयोगको कार्यालय बुटवल, सम्पर्क कार्यालय नेपालगञ्जले अन्तर्राष्ट्रिय अख्तियार दिवसका अवसरमा आयोजना गरेको कार्यक्रममा पछिल्ला बर्षहरुमा भ्रष्टाचारका उजुरी फस्र्यौट दर बढेको बताएको हो ।

उसले प्रस्तुत गरेको तथ्यांकमा गत आर्थिक बर्षमा फस्र्याैट दर ६९.५९ प्रतिशत देखिएको छ । जबकि अघिल्लो आर्थिक बर्ष ०७७/७८ मा ६४.५३ र ०७६/७७ मा ४४.३५ प्रतिशत उजुरी फस्र्यौट भएको तथ्यांक छ । बाँके, बर्दिया, दाङ र रोल्पा कार्य क्षेत्र रहेको कार्यालयले गत वर्ष ७५३ उजुरीमा ५२४ उजुरी फस्र्यौट गरेको जनाइएको छ ।

कार्यालय प्रमुख विजयराज पौडेलले उजुरी फस्र्यौटलाई प्राथमिकतामा राखेर तदारुकताका साथ काम गरिरहेकाले फस्र्यौट दर बढेको बताए। यद्यपि जनशक्ति अभावले सोचे अनुरुप प्रगति अझै हासिल हुन नसकेको पौडेलको भनाई छ । उनले उजुरी पर्दैमा डराउनु नपर्ने भन्दै गलत काम आजैदेखि नगर्ने प्रण गर्नुपर्नेमा जोड दिए । उनले प्रमाण पुष्टि नहुने खालका उजुरीमा मुद्दा नचलाइने पनि स्पष्ट पारे ।

बाँकेका निमित्त प्रमुख जिल्ला अधिकारी हरि प्याकुरेलले कर्तब्यपालनाका क्रममा नियत सफा राखे समस्या नपर्ने बताए । उनले कसैको सामाजिक प्रतिष्ठामा आँच आउने गरी नियतबस परेका उजुरीमाथि अनुसन्धान गर्दा ध्यान पुर्याउनुपर्ने बताए । नेपालगञ्ज उपमहानगरपालिकाका प्रमुख प्रशासकीय अधिकृत शिवप्रसाद रिजालले माइक्रो लेभलमा अनुसन्धानको खाँचो रहेको बताए । उनले गलत कामलाई नाइँ भन्न सक्ने आँट विकास गर्नुपर्नेमा जोड दिए ।

कार्यालयका सूचना अधिकारी श्रीधर टण्डनले स्थानीय तहका उजुरी बढी आउने गरेको तथ्यांक प्रस्तुत गरेका थिए । स्थानीय तहका शिक्षा, उपभोक्ता समिति, विकास निर्माण लगायतका विषयमा बढी उजुरी पर्ने गरेको उनले बताए । विभिन्न सरकारी कार्यालयका प्रमुख, सञ्चारकर्मी लगायत उपस्थित कार्यक्रममा सहभागीहरुले विभिन्न सल्लाह सुझाब दिनुका साथै जिज्ञासा पनि राखेका थिए ।

प्रकाशित मिति: शनिबार, मंसिर २४, २०७९ १०:२९

प्रतिक्रिया दिनुहोस्