काभ्रे बस दुर्घटनामा १३ जना मृतकको सनाखत

समाचार

गृहपृष्ठ
समाचार
काभ्रे बस दुर्घटनामा १३ जना मृतकको सनाखत

काभ्रे बस दुर्घटनामा १३ जना मृतकको सनाखत

बुधबार, मंसिर २८, २०७९ बागेश्वरी पोस्ट

नेपालगन्ज । काभ्रेपलाञ्चोकको बेथानचोक गाउँपालिका ४ चलाल गणेस्थानमा हिजो साँझ बा३ख ४३८५ नम्बरको रिजर्भ बस दुर्घटनामा १७ जनाको मृत्यु भएको छ । दुर्घटनामा मृत्यु भएका मध्ये १३ जनाको सनाखत भएको छ ।

जिल्ला प्रहरी कार्यालय काभ्रेका अनुसार मृत्यु हुनेमा बनेपा नगरपालिका ११ की ७९ वर्षीया निर्मला तामाङ, ११ वर्षीय योगेश तामाङ, ५० वर्षीय अंकुर तामाङ, ४३ वर्षीया हेमा तामाङ, १० वर्षीय पुष्कर तामाङ, २५ वर्षीया कोपिला तामाङ र ६ वर्षीया श्रेया तामाङ रहेका छन् ।

त्यस्तै बनेपा नपा १४ का ३९ वर्षीय राजकुमार तामाङ, २८ वर्षीया गीता श्रेष्ठ, मण्डनदेउपुर नपा १ का ३७ वर्षीया जेली तामाङ, धुलिखेल नपा ११ का ३० वर्षीय बुद्ध तामाङ र बेथानचोक गाउँपालिका ५ की ३२ वर्षीया मञ्जु तामाङको पनि सो बस दुर्घटनामा मृत्यु भएको छ ।

यस्तै बस चालक ललितपुरको महाँकाल ४ घर भई हाल पनौती नपा ४ बस्ने २२ वर्षीय सन्तोष तिमल्सिनाको पनि दुर्घटनामा मृत्यु भएको प्रहरीले जानकारी दिएको छ । घाइते केहीको अवस्था चिन्ताजनक रहेको प्रहरीले जनाएको छ। मृतकमध्ये पाँच जनाको नाम खुल्न बाँकी छ ।

प्रहरीको प्रारम्भिक अनुसन्धान अनुसार बस अत्यधिक गतिमा गुडेर दुर्घटना भएको हो । बस सडक मोडको भित्तामा ठोक्किएपछि दुर्घटनाग्रस्त भएको थियो । बसमा ३९ यात्रु सवार थिए । घाइतेको धुलिखेल अस्पताल, बनेपास्थित शिर ममोरियल अस्पताल, मध्यपुर ठिमी अस्पताल, वीर अस्पताल, न्यूरो अस्पताल बाँसबारी लगायतमा उपचार भइरहेको प्रमुख जिल्ला अधिकारी हुमकला पाण्डेले जानकारी दिएकी छन् ।

प्रकाशित मिति: बुधबार, मंसिर २८, २०७९ ०८:१७

प्रतिक्रिया दिनुहोस्