विद्यालय भवन बनाउन भूमीपुजन, आधारभूत स्वास्थ्य केन्द्र पनि उद्घाटन

स्थानीय

गृहपृष्ठ
स्थानीय
विद्यालय भवन बनाउन भूमीपुजन, आधारभूत स्वास्थ्य केन्द्र पनि उद्घाटन

विद्यालय भवन बनाउन भूमीपुजन, आधारभूत स्वास्थ्य केन्द्र पनि उद्घाटन

बुधबार, मंसिर २८, २०७९ बागेश्वरी पोस्ट

कोहलपुर । बाँकेको कोहलपुर नगरपालिका १५ स्थित नेपाल राष्ट्रिय आधारभूत विद्यालय चन्नहवाको चार कोठे पक्की भवन बन्ने भएको छ । राष्ट्रपति शैक्षिक सुधार कार्यक्रम अन्तर्गत चालू आर्थिक वर्षमा करिव ४५ लाखको लागतमा चार कोठे पक्की भवन बन्ने भएको हो । उक्त भवनका लागि भूमीपुजन गरिएको छ ।

आज विहान ८ः ४५ बजेको उत्तम साइतमा कोहलपुर नगरपालिकाका नगर प्रमुख पूर्णप्रसाद आचार्य, वडा अध्यक्ष दिपेन्द्रकुमार चौधरी लगायतले भूमिपुजन गरेको विद्यालयका प्रधानाध्यापक भोजेन्द्र वलीले जानकारी दिए । १ सय ९१ विद्यार्थी अध्ययनरत यो विद्यालयमा भवनको अभाव छ । एउटा जीर्ण र जस्तापाताले छाएको भवनमा विद्यार्थीहरु जोखिमपूर्ण तरिकाले अध्ययन गर्न बाध्य छन् । सुविधा सम्पन्न ४ कोठे पक्की भवन निर्माण हुने भएपछि विद्यार्थीको पठनपाठनमा सहजता ल्याउने नगर विद्यालयका प्रअ वलीको भनाई छ ।

नगर प्रमुख आचार्यले कोहलपुर नगरपालिकालाई शैक्षिक हवका रुपमा विकास गर्ने गरी आफूहरु लागि परेको बताए । उनले कोहलपुरका सामुदायिक विद्यालयको भौतिक संरचना सुधारदेखि जनशक्ति व्यवस्थापनलाई पहिलो प्राथमिकतामा राखेर नगरपालिकाले काम गरिरहेको बताए ।

भूमीपुजन कार्यक्रममा नगर शिक्षा समितिका सदस्य वीरेन्द्रबहादुर शाह, नेपाल राष्ट्रिय शिक्षक महासंघका बाँके अध्यक्ष पवन यादव, विद्यालय व्यवस्थापन समितिका अध्यक्ष सीताराम थारु, पूर्व अध्यक्ष लौटन थारु लगायतको उपस्थिति रहेको थियो ।

आधारभूत स्वास्थ्य केन्द्र उद्घाटन

बाँकेको कोहलपुर नगरपालिका १२ स्थित आधारभूत स्वास्थ्य केन्द्रको आज उद्घाटन गरिएको छ । कोहलपुर नगरपालिकाका नगर प्रमुख पूर्णप्रसाद आचार्य र उपप्रमुख संगिता सुवेदीले केन्द्रको उद्घाटन गरेका हुन् ।

वडा नम्वर १२ का वडा अध्यक्ष वीरेन्द्रकुमार शाहको सभापतित्वमा भएको केन्द्र उद्घाटन कार्यक्रमलाई सम्वोधन गर्दै नगर प्रमुख आचार्यले स्वास्थ्य केन्द्रले आमसर्वसाधरणलाई सहज र सरल ढंगले उपचार प्रवाह गर्ने विश्वास व्यक्त गरे । उनले कोहलपुर नगरपालिकाभित्र रहेका स्वास्थ्य संस्थाहरुको पूर्वाधार निर्माण, उपकरणदेखि जनशक्ति व्यवस्थापनको पाटोलाई सुदृढ गर्ने गरी आफूहरु लागिरहेको बताए ।

भएका संरचना, उपकरण र सीपको अधिकतम् प्रयोग गरेर आम नागरिकहरुले पाउनुपर्ने आधारभूत स्वास्थ्य सेवा प्रवाह गर्न पनि उनले स्वास्थ्यकर्मीहरुलाई निर्देशन दिए । यस्तै कोहलपुर नगरपालिका स्वास्थ्य शाखा प्रमुख अनिलसेन ठकुरीले केन्द्रले भोलिदेखि सरकारद्वारा तोकिएका ३५ प्रकारका औषधि विरामीले निःशुल्क प्राप्त गर्ने बताए ।

उनले विरामीको उपचार, चेकजाँच, काउन्सिलिङ लगायतका काम अब केन्द्रबाट हुने बताए । प्रयोगशाला, ल्यावसहितको केन्द्रले वडाबासीलाई धेरै राहत पुर्याउने उनको भनाई थियो । वडा सदस्य समरबहादुर थापाको स्वागत मन्तव्यबाट सुरु भएको उक्त कार्यक्रममा कोहलपुर नगरपालिकाका प्रशासकीय अधिकृत टीकाराम ढकाल, स्थानीय राजनीतिक दलका प्रतिनिधि लगायतको पनि उपस्थिति रहेको थियो ।

प्रकाशित मिति: बुधबार, मंसिर २८, २०७९ २०:४७

प्रतिक्रिया दिनुहोस्