कोहलपुर नगर प्रहरी एक्सनमा, उठाउँदै ठेलागाडा

स्थानीय

गृहपृष्ठ
स्थानीय
कोहलपुर नगर प्रहरी एक्सनमा, उठाउँदै ठेलागाडा

कोहलपुर नगर प्रहरी एक्सनमा, उठाउँदै ठेलागाडा

नगर क्षेत्रमा ठेलागाडा तथा फुटपाथ पसल निषेध

शनिबार, पुस ९, २०७९ बागेश्वरी पोस्ट

कोहलपुर । कोहलपुर नगर प्रहरीले नगर क्षेत्रमा ठेला तथा फुटपाथ पसल संचालनमा निषेध गरेको छ । गएको मंसिर २७ गतेको कार्यपालिकाको बैठकमा नगर क्षेत्रमा अव्यवस्थित तरिकाले ठेला तथा फुटपाथ पसल व्यवसाय संचालन गर्न निषेध गर्ने निर्णय भएसँगै नगर प्रहरीले त्यसको कार्यान्वयन समेत सुरु गरेको छ ।

कोहलपुर नगरपालिका क्षेत्रभित्र ठेलागाडा, सडक तथा फुटपाथ व्यवसायीहरुको व्यवस्थापन गर्न कार्यदल नै गठन गरिएको थियो । वडा नं.१२ का वडा अध्यक्ष वीरेन्द्रकुमार शाहको संयोजकत्वमा गठित समितिले प्रतिवेदन समेत बुझाइसकेको छ । प्रतिवेदनमा औंल्याइएका सुझावलाई कार्यान्वयनमा लैजाने निर्णय गर्दै कार्यपालिका बैठकलले तत्कालका लागि ठेला तथा फुटपाथ व्यवसायीहरुलाई व्यवसाय गर्न कोहलपुर उद्योग बाणिज्य संघ परिसरसँगै पछाडि रहेको खाली स्थान छुट्याएको थियो ।

उद्योग बाणिज्य संघसँगको सहकार्यमा ती व्यवसायीलाई संघको पछाडीको खाली जग्गामा व्यवसाय गर्न दिइएको छ । व्यवसाय संचालनका लागि संघमा सूचीकृत हुनुपर्नेछ । त्यहाँ कपडा, फलफुल र तरकारी व्यवसायीहरु बस्न सक्नेछन् । ती स्थान बाहेक नगर क्षेत्रमा ठेला तथा फुटपाथमा पसल व्यवसाय संचालन गरेको पाइएपछि केही व्यवसायीहरुलाई नगर प्रहरीले कारवाहीको दायरामा ल्याउन सुरु गरेको नगर प्रहरी प्रमुख वीरबहादुर थापाले जानकारी दिए ।

आज चार वटा ठेला व्यवासायीलाई कारवाहीको दायरामा ल्याइएको छ । ‘नगर क्षेत्रमा ठेला घुमाएर–डुलाएर व्यवसाय गर्नेलाई अब निश्चित स्थान तोकिएको छ थापाले भन्नुभयो–‘त्यो बाहेक अन्य ठाउँमा पसल व्यवसाय संचालन गरेको पाइए कारवाही हुन्छ ।’ नगर क्षेत्रमा अव्यवस्थित तरिकाले ठेला व्यवासाय संचालन गर्दा दुर्घटनाको जोखिम पनि हुने र शहरलाई समेत कुरुप देखाउने भएकाले त्यसलाई व्यवस्थित गर्ने कामलाई कडाई गरिएको नगरपालिकाका प्रमुख प्रशासकीय अधिकृत टिकाराम ढकालले बताए ।

प्रकाशित मिति: शनिबार, पुस ९, २०७९ १८:३५

प्रतिक्रिया दिनुहोस्