डुडुवाको सबैभन्दा ठूलो सडक योजनाको निर्माण शुरु

स्थानीय

गृहपृष्ठ
स्थानीय
डुडुवाको सबैभन्दा ठूलो सडक योजनाको निर्माण शुरु

डुडुवाको सबैभन्दा ठूलो सडक योजनाको निर्माण शुरु

मंगलबार, पुस १२, २०७९ बागेश्वरी पोस्ट

डुडुवा (बाँके) । बाँके डुडुवा गाउँपालिकाले सबैभन्दा ठूलो सडक योजना कार्यान्वयनमा ल्याएको छ । गाउँपालिकाको अति विकट क्षेत्र मानिने रामनगर पाँझा पिपिसी सडक निर्माणको कार्य शुरु भएको हो ।

सडक निर्माण पश्चात गाउँपालिकाको वडा नंं. २ अन्र्तगत डुडुवा नालापारी रामनगर, पाँझा, चौफेरी, कृषि चौफेरी, वोर्डर चौफेरी, छिटाईपुर्वाका करिब साढे तीन सय बढी घरधुरी र नरैनापुर गाउँपालिका केही गाउँका मानिसहरुले प्रत्यक्ष लाभ लिनेछन् भने खेतीकिसानी गर्नेहरुका लागि पनि सहयोग पुग्नेछ ।

सडकको अभावमा अहिले त्यस क्षेत्रका करिब ६ गाउँका नागरिकहरुलाई आवतजावतका लागि निकै सास्ती हुँदै आएको छ । विशेषगरी वर्षाको समयमा बाढी र डुबानका बेला कच्ची सडकका कारण निकै समस्या हुँदै आएको छ । सडकको अभावमा विरामीलाई सदरमुकाम ल्याउन पनि समस्या रहेको छ ।

डुडुवा गाउँपालिका वडा नंं. २ अमृतपुर्वादेखि रामनगर पाँझासम्म साढे तीन किलोमिटर पिसिसी सडकको आज एक कार्यक्रमका बीच गाउँपालिका अध्यक्ष नरेन्द्रकुमार चौधरीले शिलान्यास गरे । शिलान्यास गर्दै अध्यक्ष चौधरीले गाउँपालिकाको विकट क्षेत्रका स्थानीयका लागि आवतजावतमा सहजताका लागि ठूलो समस्या रहेकाले यो सडक निर्माणपछि ठूलो राहत पुग्ने विश्वास व्यक्त गरे । उनले गाउँपालिकाकै अति दुर्गम र वाढी डुबानबाट पीडित स्थानीयहरुको सहजकताका लागि सिधा सम्पर्क जोड्न सडक निर्माणको कार्य शुरु भएको भन्दै सडक निर्माणपछि त्यहाँका मानिसहरुलाई सहजता प्रदान गर्ने बताए ।

साढे तीन किलोमिटर पिसिसी सडकसंगै एक वटा कच्वे, १५ वटा कल्भर्ट निर्माणको कार्य शुरु भएको गाउँपालिकाका प्राविधिक शाखा प्रमुख इन्जिनियर सुरेन्द्र कुमार बर्माले बताए । उनका अनुसार नारायणम निर्माण सेवा प्रालिले ६ करोड ९ लाख २२ हजार ६ सय २७ रुपैयाँको लागतमा सो सडक निर्माण गर्नेछ ।

डुडुवा गाउँपालिकाका प्रायः सबै वडा बाढी प्रभावित क्षेत्र रहेकाले त्यहाँका अधिकाँश सडक पिसिसी नै उत्तम मानिएकाले सबैजसो सडक पिसीसी नै निर्माण गरिएको पालिकाका प्राविधिक शाखाका ओभरसियर मदनेश्वर झाले बताए । उनका अनुसार पालिकामा निर्माण भएका अधिकाँश सबै सडकहरु पिसीसी गरिएको छ भने यो सडक बाढी र डुबान क्षेत्रमा कालोपत्रे भन्दा पनि भरपर्दो रहेकोले उत्तम मानिएको हो ।

प्रकाशित मिति: मंगलबार, पुस १२, २०७९ २०:१४

प्रतिक्रिया दिनुहोस्