चिसोमा जीवन रक्षाको माग गर्दै गृह मन्त्रालयको ध्यानाकर्षण

स्थानीय

गृहपृष्ठ
स्थानीय
चिसोमा जीवन रक्षाको माग गर्दै गृह मन्त्रालयको ध्यानाकर्षण

चिसोमा जीवन रक्षाको माग गर्दै गृह मन्त्रालयको ध्यानाकर्षण

बिहीबार, पुस १४, २०७९ बागेश्वरी पोस्ट

नेपालगञ्ज । चिसो तथा शितलहर शुरु भएपछि त्यसबाट बच्नका लागि पूर्व तयारी बारे बाँके प्रशासनमार्फत गृह मन्त्रालयको ध्यानाकर्षण गराइएको छ । बाँकेका नागरिक समाजका अगुवाहरुको एक समूहले आज बाँकेका सहायक प्रमुख जिल्ला अधिकारीमार्फत देशका पश्चिम जिल्लाहरुमा एक्कासी बसेको चिसोको व्यवस्थापन तथा पूर्व तयारीका बारेमा गृह मन्त्रालयको ध्यानाकषर्ण गराएको हो ।

अहिले बाँकेमा चिसो बढेपछि शितलहर र कुहिरोका कारण जेष्ठ नागरिक, असहाय, बालवालिका, दिर्घरोगी, मजदुर, अति विपन्न परिवारका नागरिकहरुको स्वास्थ्यमा प्रतिकूल असर परी विरामी भई जनजीवन कष्टकर हुन थालेको छ । सो कुरालाई मध्यनजर गर्दै ५ बुँदे ध्यानाकर्षण गराइएको हो ।

शितलहरका कारण मानव जीवनमा पर्न सक्ने असर र त्यसबाट बच्ने उपायका बारे प्रत्येक गाउँ, टोलमा जनचेतना फैलाउने कार्य तत्काल गर्न गराउन, चिसो तथा शितलहरका कारण नागरिकको जीवन रक्षार्थ प्रत्येक टोलटोलमा दाउराको व्यवस्था गर्न, ज्येष्ठ नागरिक, असहाय, बालवालिका, दिर्घरोगी, अतिविपन्न परिवारका नागरिकहरुलाई जाडो तथा शितलहरबाट सुरक्षित राख्नका लागि न्यानो कपडा तथा उचित राहतको व्यवस्थापन गर्न, शितलहरका कारण हुन सक्ने विरामीलाई औषधि उपचारको यथोचित समयमा व्यवस्थापन तथा पूर्व तयारीको राम्रो ब्यवस्थापन गर्न र विपत जोखिम न्यूनीकरण तथा व्यवस्थापन ऐन २०७४ अनुसारको मानवीय काम कारवाहीलाई अघि बढाउन माग गरि त्यसको कार्यन्वयनका लागि ज्ञापनपत्र बुझाइएको हो ।

सूचना र मानव अधिकार अनुसन्धान केन्द्रका अध्यक्ष अधिबक्ता विश्वजित तिवारी नेतृत्वको समूहले आज ज्ञापनपत्र बुझाएको हो । तिवारीसंगै ज्येष्ठ नागरिक कृष्णमुरारीप्रसाद भट्ट, सूचना अभियन्ता शैलेन्द्र बैश्य, नरसिंह सोनी, अरुण तिवारीको समूहले बाँकेका सहायक प्रमुख जिल्ला अधिकारी टोपेन्द्रबहादुर केसीमार्फत ज्ञापनपत्र बुझाएको छ ।

प्रकाशित मिति: बिहीबार, पुस १४, २०७९ २१:४३

प्रतिक्रिया दिनुहोस्