जानकीको हिउँदे गाउँसभा: गाउँ प्रहरी ऐन पारित

स्थानीय

गृहपृष्ठ
स्थानीय
जानकीको हिउँदे गाउँसभा: गाउँ प्रहरी ऐन पारित

जानकीको हिउँदे गाउँसभा: गाउँ प्रहरी ऐन पारित

६ महिनाको प्रगति ३६.५५ प्रतिशत

सोमबार, पुस २५, २०७९ बागेश्वरी पोस्ट

जानकी (बाँके) । जानकी गाउँपालिकाको १३औं हिउँदे गाउँसभा केही ऐन पारित गर्नुका साथै विभिन्न निर्णयहरु गर्दै सम्पन्न भएको छ । आजै वडा नम्बर ३ मानपुरस्थित गाउँ कार्यपालिकाको कार्यालयमा शुरु भएको १३औं हिउँदे गाउँसभा बहुमत कार्यपालिका सदस्यहरुको उपस्थितिमा केही ऐन पारित गर्नुका साथै विभिन्न निर्णयहरु गर्दै सम्पन्न भएको हो ।

प्रमुख प्रशासकीय अधिकृत सिंहराज डाँगीले आन्तरिक राजश्व बृद्धि गर्ने उद्देश्यले जानकी गाउँपालिकाको गाउँ प्रहरी ऐन २०७९ पारित गरिएको बताए । अब गाउँपालिकामा एक जना असई, एक जना हवल्दार र ६ जना गाउँ प्रहरी जवान भर्ना गर्ने बाटो खुलेको छ । यस्तै आर्थिक ऐन २०७९ संशोधनसहित पारित गरिएको छ ।

पालिकामा अपुग कर्मचारी व्यवस्थापन गर्न कानुन बनाएर ऐन पारित गर्नुपर्नेमा हालसम्म नभएकाले त्यसलाई पनि पारित गरिएको छ । पालिकामा अब सैद्धान्तिक बेरुजु आउने अवस्थाको अन्त्य भएको डाँगीले बताए । १३औं गाउँसभाले यसअघि कार्यपालिका बैठकले गरेका सम्पूर्ण निर्णयहरु अनुमोदन समेत गरेको छ । गाउँसभाले प्रेस सल्लाहकार पनि परिवर्तन गरेको छ । प्राइम टेलिभिजनमा कार्यरत पत्रकार रविन्द्र घिमिरे सल्लाहकार नियुक्त भएका छन् ।

गाउँसभामा चालू आर्थिक बर्षको वितेको ६ महिनाको बजेट खर्च प्रगतिको समिक्षा र खर्च हुन नसकेको वडागत, शाखागत तथा गाउँकार्यपालिका कार्यालयबाट रहेको बजेटमा पनि संशोधन गरिएको छ । गाउँपालिकाको अनुदानका शिक्षक एवम् कार्यालय सहयोगीहरुका लागि आगामी ६ महिनाको अपुग ३६ लाख रकम थप गर्ने निर्णय गाउँसभाले गरेको छ । यस्तै वडा नम्बर १ को वडा कार्यालय बनाउन जग्गा खरिदका लागि १० लाख रुपैयाँ थप गर्ने निर्णय पनि गाउँसभाले गरेको सिंहले जानकारी दिए । गएको ६ महिनामा ३१ करोड ६१ लाख ७० हजार रुपैयाँ खर्च भएको छ । यो हिसाबले ६ महिनाको प्रगति ३६.५५ प्रतिशत देखिएको छ ।

१९ जना कार्यपालिका बोर्ड सदस्यहरुको उपस्थितिमा गाउँसभा सम्पन्न भएको अध्यक्ष छब्बन खाँले बताए । "आइतबार हामी सबै कार्यपालिकाका सदस्यहरु कार्यपालिका बैठकमा उपस्थित भएर सर्वसहमतिमा सोमबार (आज) गाउँसभा गर्ने निर्णय गरेका थियौं, तर, केही वडा अध्यक्ष र सदस्यहरु आज पटक पटक फोन सम्पर्क गर्दा पनि आउनुभएन," अध्यक्ष खाँले भने-"पालिकालाई अनिर्णयको बन्दी बनाएर राख्ने कुरो भएन, त्यसैले हामी बहुमत सदस्यहरु उपस्थित भएर गाउँसभा सम्पन्न गरेका छौं ।"

गाउँसभाको लुम्बिनी प्रदेशसभा सदस्य बादशाह कुर्मीले उद्घाटन गरेका थिए । गाउँपालिका अध्यक्ष खाँको अध्यक्षतामा भएको उद्घाटन समारोहमा संघ, प्रदेश र जिल्ला समन्वय समितिमा निर्वाचित भएका जनप्रतिनिधिहरुलाई दोसल्ला ओढाई सम्मान गरिएको थियो । पालिका अध्यक्ष खाँले लुम्बिनी प्रदेशसभामा निर्वाचित सांसद बादशाह कुर्मी, जिल्ला समन्वय समिति प्रमुख ज्ञानेन्द्रकुमार चौधरी, उपप्रमुख सीता कार्की लगायत जिल्ला समन्वय समदस्यहरुलाई सम्मान गरिएको हो । प्रतिनिधिसभातर्फ निर्वाचित सांसदद्वय किशोरसिंह राठौर र आशा विक भने समारोहमा उपस्थित थिएनन् ।

No description available.

गाउँसभाको उद्घाटन सत्रमा बोल्दै सांसद कुर्मीले जानकीको विकासका लागि आफू प्रतिबद्ध भएर लाग्ने बताए । उनले जानकीमा पक्षपातरहित विकास गर्न जरुरी रहेको बताउँदै पछाडि परेका क्षेत्रको विकासका लागि विशेष राणनीति अपनाउनुपर्ने उल्लेख गरे । जिल्ला समन्वय समिति प्रमुख चौधरीले विकास र समृद्धि हासिल गर्न हातेमालो गरेर अघि बढ्न जरुरी रहेको बताए । उनले भौतिक विकासमा मात्र ध्यान नदिई समाज रुपान्तरणका लागि सामाजिक विकासलाई पनि प्राथमिकतामा राख्नुपर्ने बताए ।

गाउँपालिका अध्यक्ष खाँले वितेको ६ महिनामा पालिकाले केही महत्वपूर्ण कार्यहरु गरेको जानकारी गराउँदै वडा वडामा बैंक, छोरी जन्मने वित्तिकै ५ हजार रुपैयाँको विमा लगायतका कामको सुरुवात आफूले गरेको बताए । गाउँपालिकाका प्रबक्ता टिकानाथ यादवले गाउँपालिकालाई अब्बल सावित गर्दै जनपक्षीय कामहरु अगाडि बढाउन आफूहरु प्रतिबद्ध रहेको बताए । प्रमुख प्रशासकीय अधिकृत सिंहराज डाँगीले संघियताको सफल र असल अभ्यासमा खरो उत्रिँदै जनतालाई त्यसको अनुभूति दिलाउने गरी काम गर्न आवश्यक रहेको बताए ।

No description available.