जानकीको बेलभार स्वास्थ्य चौकीमा गर्भवती महिलाका लागि भिडियो एक्सरे सेवा

स्थानीय

गृहपृष्ठ
स्थानीय
जानकीको बेलभार स्वास्थ्य चौकीमा गर्भवती महिलाका लागि भिडियो एक्सरे सेवा

जानकीको बेलभार स्वास्थ्य चौकीमा गर्भवती महिलाका लागि भिडियो एक्सरे सेवा

शुक्रबार, पुस २९, २०७९ बागेश्वरी पोस्ट

जानकी (बाँके) । जानकी गाउँपालिकाको वडा नम्बर २ स्थित बेलभार स्वास्थ्य चौकीमा गर्भवती महिलाहरुको लागि भिडियो एक्सरे सेवा शुरु भएको छ । अब यहाँका गर्भवती महिलाहरुले आफ्नै गाउँठाउँमा भिडियो एक्सरे गर्न पाउने भएका छन् । गाउँपालिका अध्यक्ष छब्बन खाँले भिडियो एक्सरे सेवाको शुभारम्भ गरेका हुन् ।

No description available. त्यसक्रममा बोल्दै अध्यक्ष खाँले भिडियो एक्सरेका लागि गर्भवती महिलाहरुको नेपालगञ्ज जानुपर्ने बाध्यता अब हटेको बताए । "गाउँघरमै भिडियो एक्सरे सेवा शुरु हुँदा यहाँका गर्भवती महिलाहरुलाई सजिलो हुने भएको छ, वडा नम्बर १ मा मात्र यो सेवा थियो, अब २ नम्बरमा पनि शुरु भएको छ," उनले भने- "स्थानीय सरकारको अनुभूति अब स्थानीयले गर्नेछन् ।"

वडा नम्बर २ का वडा अध्यक्ष चन्द्रिकाप्रसाद गुप्ताले जनताको माग र आवश्यकता अनुसार भिडियो एक्सरे सेवा शुभारम्भ गरिएको बताए । स्वास्थ्य शाखा प्रमुख दलबहादुर रानाले गर्भवती महिलाहरुको सहज सेवाका लागि भिडियो एक्सरे सेवा शुरु गरिएको बताए । उनले अघिल्लो स्थानीय सरकारको पालामा वडा नम्बर १ मा र अहिले वडा नम्बर २ मा यो सेवा शुरु भएको बताए । मातृ मृत्युदर बढिरहेको अवस्थामा स्थानीयहरुको आनीबानी र आर्थिक अवस्थाले नेपालगञ्जमा नजाने स्थिति रहँदै आएकोमा अब सबै गर्भवती महिलाले सहजरुपमा सेवा लिएर लाभान्वित हुने रानाले बताए । प्रदेश स्वास्थ्य मन्त्रालय अन्तर्गत तालिम केन्द्रबाट उपलब्ध ९ लाख मूल्य बराबरको भिडियो एक्सरे जडान गरिएको उनले जानकारी दिए ।

कार्यक्रममा उपाध्यक्ष रामप्यारी यादव, सामाजिक विकास समितिका संयोजक रामआँचल धोबी लगायतले धारणा राखेका थिए । त्यसक्रममा वडा नम्वर ३ का अध्यक्ष राजकुमार कुर्मी, कार्यपालिका सदस्य राजेन्द्र सिंह, ४ का वडा सदस्य हवि पठान, गाउँपालिका अध्यक्ष छब्बन खाँका स्वकीय सचिव शोहराव दर्जी लगायत स्वास्थ्य चौकीमा कार्यरत डाक्टर, नर्स र कर्मचारीहरुको पनि उपस्थिति रहेको थियो ।

प्रकाशित मिति: शुक्रबार, पुस २९, २०७९ ०८:४१

प्रतिक्रिया दिनुहोस्