स्वास्थ्य मन्त्रीद्वारा भेरी अस्पतालको निरीक्षण र डायलाइसिस कक्षको उद्घाटन

स्थानीय

गृहपृष्ठ
स्थानीय
स्वास्थ्य मन्त्रीद्वारा भेरी अस्पतालको निरीक्षण र डायलाइसिस कक्षको उद्घाटन

स्वास्थ्य मन्त्रीद्वारा भेरी अस्पतालको निरीक्षण र डायलाइसिस कक्षको उद्घाटन

'सरकार आम नागरिकमा गुणस्तरीय स्वास्थ्य सेवाको पहुँच सुनिश्चितताका लागि प्रतिबद्ध'

आइतबार, माघ ८, २०७९ बागेश्वरी पोस्ट

नेपालगन्ज । स्वास्थ्य तथा जनसंख्या मन्त्री पदम गिरीले सरकार आम नागरिकमा गुणस्तरीय स्वास्थ्य सेवाको पहुँच सुनिश्चितताका लागि प्रतिबद्ध रहेको बताएका छन् ।

भेरी अस्पतालको निरीक्षणसंगै डायलाइसिस कक्षको आज उद्घाटन गर्दै मन्त्री गिरीले नागरिकलाई गुणस्तरीय स्वास्थ्य सेवा प्रदान गर्नु सरकारको दायित्व भएको बताए । 'नेपाल सरकारको प्रमुख उद्देश्य भनेकै सबैलाई सहज स्वास्थ्य सेवाको पहुँच स्थापित गर्नु हो,' उनले भने-'कुनै पनि नागरिकले उपचार अभावमा ज्यान गुमाउन नपरोस् भन्नेमा सरकार लागिपरेको छ ।'

भेरी अस्पताल नेपालगन्जको डायलाइसिस सेवा थप बिस्तार समेत गरिएको छ । डायलाइसिस कक्षमा यसअघि ६ बेड रहेकोमा अहिले बढाएर १० बेड पुर्याइएको अस्पतालका मेडिकल सुपरिटेन्डेन्ट डा.बद्री चापागाईंले जानकारी दिए।

स्वास्थ्य मन्त्रालयका सचिव डा.रोशन पोख्रेलले सरकारले संघीय अस्पतालको सेवा गुणस्तरीय बनाउन जनशक्ति व्यवस्थापनसँगै भौतिक संरचना सुधारको काम गर्दै आएको बताए । उनले संघीय अस्पतालहरुलाई प्रबिधिमैत्री बनाउन सरकार प्रयासरत रहेको पनि बताए ।

अस्पताल विकास समितिका अध्यक्ष प्रमोद धितालको अध्यक्षतामा भएको कार्यक्रममा भेरी अस्पतालका मेडिकल सुपरिटेन्डेन्ट डा. चापागाईंले अस्पतालको हालको अवस्था, अस्पतालले प्रवाह गरिरहेको सेवा, समस्या र भावी योजनाबारे जानकारी गराएका थिए । कार्यक्रममा संघीय सांसदहरु सूर्य ढकाल, डा. धवलशम्शेर राणा र दीपा शर्मा, नेपालगन्ज उपमहानगरपालिकाका नगर प्रमुख प्रशान्त विष्ट लगायत उपस्थित थिए ।

उक्त कार्यक्रममा स्वास्थ्य कार्यालय बाँकेका प्रमुख सुनिता पौडेल र नेपालगन्ज उपमहानगरपालिकाका स्वास्थ्य महाशाखा प्रमुख रामबहादुर चन्दले बाँकेमा फैलिएको दादुरा महामारीको अबस्था र रोकथामबारे भइरहेको प्रयासबारे जानकारी गराएका थिए । कार्यक्रमको सहजीकरण भेरी अस्पतालका स्त्री रोग विशेषज्ञ डा. कीर्तिपाल सुवेदीले गरेका थिए ।

प्रकाशित मिति: आइतबार, माघ ८, २०७९ १३:५१

प्रतिक्रिया दिनुहोस्