अपहरणमा परेका जनकपुरका दुई युवाको भारतमा हत्या

सुरक्षा-अपराध

गृहपृष्ठ
सुरक्षा-अपराध
अपहरणमा परेका जनकपुरका दुई युवाको भारतमा हत्या

अपहरणमा परेका जनकपुरका दुई युवाको भारतमा हत्या

आइतबार, माघ ८, २०७९ बागेश्वरी पोस्ट

नेपालगन्ज । बेपत्ता भएका दुई जना युवकहरुको अपहरणपछि हत्या भएको छ । १३ दिनदेखि सम्पर्कविहीन भएका धनुषाको जनकपुरधाम उपमहानगरपालिका वडा नम्बर ८ का २१ वर्षीय रोहित साह र वडा नम्बर १३ का २२ वर्षीय विष्णु साहको भारतमा हत्या भएको हो ।

पुस २७ गते भारत गएका दुई युवा सम्पर्कविहीन भएको खबर आएको थियो । उनीहरू भारत सितामढी जिल्ला बेला परिहारमा रहेका आफन्तको घरमा गएका थिए । गत पुस २७ गते एकाएक बेपत्ता भएका दुवै जनाको परिवारलाई अपहरणकारीले गत सोमबारसम्म ५० लाख रुपैयाँ फिरौती माग गरेका थियो ।

अपहरणकारीले विष्णुको आवाज रेकर्ड गरेर उनका आफन्तलाई फोनबाट सुनाएका थिए । परिवारले अपहरणकारीलाई २० लाख दिन राजी भएका पनि थिए । अपहरणकारीले २० लाख रुपैयाँ लिएर सर्लाहीको मलंगवा नाका नजिक बोलाएपछि परिवारजनले प्रहरीलाई जानकारी गराएका थिए ।

भारतीय प्रहरी र नेपाल प्रहरी दुवै युवकलाई अपहरण मुक्त गराउन भूमिका खेलेपनि आज बिहान दुई वटा शव फेला पारेपछि बिहान मृतक युवकहरुको आफन्तहरुलाई भारतीय प्रहरीले बोलाएको थियो । उनीहरुको शव भारतको बेला परिहारस्थित प्रहरी कार्यालयमा राखिएको छ ।

घटनापश्चात प्रहरीले पाँचजनालाई पक्राउ गरेको छ । घटनामा संलग्न रहेको आरोपमा धनुषा प्रहरीले २ जना र भारतीय प्रहरीले तीन जनालाई पक्राउ गरेको धनुषाका एसपी खड्काले जानकारी दिए । उनीहरुको नाम अहिले गोप्य राखिएको छ । चार जना फरार रहेकाले खोजबिन भइरहेको प्रहरीले जनाएको छ । मृतकहरुको शव भारतमा भएकाले कानुनी प्रक्रिया पूरा गरी नेपाल ल्याइने जिल्ला प्रहरी कार्यालय धनुषाले जनाएको छ ।

प्रकाशित मिति: आइतबार, माघ ८, २०७९ १५:३४