बिरामीलाई हिंस्रक व्यवहार गर्ने नेपाली नर्स अष्ट्रेलियामा पक्राउ

विश्व

गृहपृष्ठ
विश्व
बिरामीलाई हिंस्रक व्यवहार गर्ने नेपाली नर्स अष्ट्रेलियामा पक्राउ

बिरामीलाई हिंस्रक व्यवहार गर्ने नेपाली नर्स अष्ट्रेलियामा पक्राउ

मंगलबार, माघ १७, २०७९ बागेश्वरी पोस्ट

नेपालगन्ज । नेपालबाट वर्किङ भिसामा अष्ट्रेलिया पुगेर काम गर्दै आएकी एक जना नेपाली नर्सलाई हिंस्रक व्यवहार गरेको आरोपमा प्रहरीले पक्राउ गरेको छ ।

अष्ट्रेलियाको एस्थिया हेल्थमा काम गर्दै आएकी नर्स अस्मिता पाण्डेले अस्पतालमा भर्ना भएर उपचार गराइरहेकी एक जना वृद्ध अवस्थाकी बिरामीलाई कुटेको आरोपमा पक्राउ गरिएको हो ।

नर्स पाण्डेले ती बिरामीलाई कुटेपछि अर्कि नर्सले अस्पताल प्रशासनलाई खबर गरे पश्चात् उनलाई पक्राउ गरिएको नाइनन्युज सिड्नीले जनाएको छ ।

अस्पतालमा उपचाररत बिरामीमाथि हिंस्रक व्यवहारका कारण उनलाई जेल सजाय हुन सक्ने अनुमान गरिएको छ । नर्स पाण्डेले ९५ वर्षीया वृद्ध बिरामी जोन मुरेलाई थप्पड हानेर धकेलेको स्वीकार गरिसकेकी छिन् ।

नर्स पाण्डेले त्यहाँ राखिएका वृद्ध–वृद्धालाई निरन्तर हातपात गर्थिन् । एक–पटक वृद्धलाई सावरले हिर्काएको देखिएको थियो । पाण्डेले चिया कोठामा सहकर्मीहरू सामू आफूले अर्को एक वृद्धको अनुहारमा मुक्का हानेको भन्दै गर्वसाथ बताएकी थिइन् । गत वर्ष नै सहकर्मीहरूले उनका हिंसात्मक क्रियाकलापबारे प्रहरीमा रिपोर्ट गरेका थिए । त्यसपछि प्रहरीले थालेको अनुसन्धानमा उनले आफूमाथिका आरोपहरू स्विकार गरिन् र प्रहरीले हिरासतमा लियो ।

अहिले गर्भवती भएकी नर्स पाण्डेलाई स्वास्थ्य सेवामा काम गर्न प्रतिबन्ध लगाइएको छ । उनीबाट पीडित बनेका अर्का बिरामीले प्रहरीमा रिपोर्ट गरिएको बताइएको छ ।

अब मार्च महिनामा अदालतमा हुने सुनुवाइमा नर्स पाण्डे जेल जान सक्ने प्रबल सम्भावना रहेको छ ।

प्रकाशित मिति: मंगलबार, माघ १७, २०७९ १०:३२