धनुषा थुनुवा फरार प्रकरण:असइसहित ३ प्रहरी निलम्बनमा

सुरक्षा-अपराध

गृहपृष्ठ
सुरक्षा-अपराध
धनुषा थुनुवा फरार प्रकरण:असइसहित ३ प्रहरी निलम्बनमा

धनुषा थुनुवा फरार प्रकरण:असइसहित ३ प्रहरी निलम्बनमा

एक थुनुवा नियन्त्रणमा, इन्स्पेक्टरसहित सबै जिल्ला तानिए

मंगलबार, माघ १७, २०७९ बागेश्वरी पोस्ट

नेपालगन्ज । धनुषा थुनुवा फरार प्रकरणमा ३ जना प्रहरी निलम्बनमा परेका छन् । जिल्ला प्रहरी कार्यालय धनुषाले इलाका प्रहरी कार्यालय सखुवा महेन्द्रनगरका कमाण्डर प्रहरी निरीक्षक बेचन यादवसहित २५ जनालाई समेत जिल्लामा फिर्ता बोलाएको छ ।

इलाका प्रहरी कार्यालय सखुवा महेन्द्रनगरको हिरासतबाट हिजो बिहान २/३ बजेको समयमा ६ जना थुनुवाहरु भित्ता फोडेर फरार भएपछि उक्त समयमा डीयुटीमा रहेका हिरासत जुनियर अधिकृत प्रहरी सहायक निरीक्षक (असइ) अशोक मण्डल, वरिष्ठ प्रहरी हवल्दार सरोज रेग्मी र प्रहरी जवान रोहन मगरलाई निलम्बन गरिएको धनुषा प्रहरीले जानकारी दिएको छ ।

फरार भएका थुनुवामध्ये हातहतियार मुद्दाका अभियुक्त मिथिला नगरपालिका ६ का रोशन महतोलाई आफन्तको घरमा लुकेर बसिरहेको अवस्थामा प्रहरीले हिजो साँझ पक्राउ गर्न सफल भएको छ । अन्य फरार रहेका थुनुवाहरुको खोजीकार्य जारी रहेको प्रहरीले जनाएको छ ।

जिल्ला प्रहरी कार्यालय धनुषाले उक्त इलाका प्रहरी कार्यालयको कमाण्डरको रुपमा प्रहरी नायब निरीक्षक मुक्ति नारायण यादवलाई पठाएको छ ।

प्रकाशित मिति: मंगलबार, माघ १७, २०७९ १०:५७

प्रतिक्रिया दिनुहोस्