बलि चढाउन भारत पुर्‍याइएकी १६ वर्षीया नेपाली बालिकाको उद्दार, ६ जना पक्राउ

सुरक्षा-अपराध

गृहपृष्ठ
सुरक्षा-अपराध
बलि चढाउन भारत पुर्‍याइएकी १६ वर्षीया नेपाली बालिकाको उद्दार, ६ जना पक्राउ

बलि चढाउन भारत पुर्‍याइएकी १६ वर्षीया नेपाली बालिकाको उद्दार, ६ जना पक्राउ

शुक्रबार, माघ २०, २०७९ बागेश्वरी पोस्ट

नेपालगन्ज । बलि दिन भारत पुर्‍याइएकी एक १६ वर्षे नेपाली बालिकाको नयाँ दिल्लीबाट उद्धार गरिएको छ । मानव बेचबिखन अनुसन्धान ब्युरोको पहलमा भारतको दिल्लीस्थित मङ्गलबजार गल्लीबाट मङ्गलबार उद्धार गरिएको हो । उद्धारपछि बालिकालाई बिहीवार नेपाल ल्याएर एक सामाजिक संस्थाको जिम्मेवारीमा राखिएको छ ।

ब्यूरोले आज पत्रकार सम्मेलन गरी बालिकाको उद्धारबारे जानकारी दिएको हो । “बालिकालाई तान्त्रिक बाबासँग भेटाइ तान्त्रिक बाबा खुशी भएमा अथाहा पैसा पाउने भनिएको रहेछ । भारत लानुअघि बालिकाको तौल, उचाई, शरीरमा दाग, टाटु र रजस्वला भए–नभएको परीक्षण गरिएको रहेछ”, ब्युरो निर्देशक प्रहरी वरिष्ठ उपरीक्षक जीवनकुमार श्रेष्ठले भने ।

बालिकालाई भारत लैजाने कार्यमा संलग्न ६ जनालाई प्रहरीले पक्राउ गरेको छ । अझै अनुसन्धान जारी रहेको बताउँदै प्रहरीले पक्राउ पर्नेहरुको नाम सार्वजनिक गरेको छैन ।

प्रहरी वरिष्ठ उपरीक्षक श्रेष्ठका अनुसरण अनुसार बालिकालाई भारत लानु अघि र लगेपछि दुई पटक शारीरिक परीक्षण गरिएको थियो । साठी केजी तौल भएको, कम्तीमा उचाइ ५ फिट ४ इञ्च भन्दा माथि भएको, शरीरमा कुनै प्रकारको दाग वा टाटु, कुनै अङ्गमा चोटपटक नभएको र रजस्वला नभएको बालिकाको खोजी हुने क्रममा उक्त बालिकालाई भेटाइएको अभियुक्तहरुले जानकारी दिएको प्रहरीको भनाइ छ ।

प्रहरीका अनुसार पीडित बालिकालाई मंसिर १७ गते मामाघरबाट काठमाडौँ ल्याइएको थियो । पुस १९ सम्म काठमाडौँमा उनलाई बन्धक बनाइएको थियो । २० पुस विभिन्न व्यक्तिहरु मिलेर उनलाई स्थलमार्गबाट सुनौली नाका हुँदै भारतको नयाँदिल्ली पहाडगञ्ज लगेका थिए ।

"अभियुक्तले बालिकालाई मुख्य तान्त्रिक बाबासँग केही दिनमा भेटाउने योजना बनाएको पाइएको छ । उनीहरुको आगामी पूर्णिमामा बालिकाको बलि चढाउने योजना रहेछ " श्रेष्ठले भने।

भारत पु¥याएपछि भारतका विभिन्न तीन स्थानमा रहेका तान्त्रिक बाबासमक्ष विभिन्न मितिमा निज बालिकालाई लगिएको थियो । आमा र बाबुबीचको सम्बन्ध खटपटका कारण बालिका मामाघरमा बस्दै आएकी थिइन । ती बालिकालाई प्रलोभन देखाउनेमा बालिकाको नजिकको साथी र महिला संलग्न रहेको खुलेको छ ।

अहिले प्रहरीले यस घटनामा संलग्न ६ जनालाई पक्राउ गरी थप अनुसन्धान अघि बढाएको निर्देशक श्रेष्ठले जानकारी दिए ।

प्रकाशित मिति: शुक्रबार, माघ २०, २०७९ १६:५८

प्रतिक्रिया दिनुहोस्