बाँकेको नरैनापुरको मियापूर्वामा धार्मिक मेला सुरु

स्थानीय

गृहपृष्ठ
स्थानीय
बाँकेको नरैनापुरको मियापूर्वामा धार्मिक मेला सुरु

बाँकेको नरैनापुरको मियापूर्वामा धार्मिक मेला सुरु

मन्त्री नमूना र गाँउपालिका अध्यक्ष शाहद्वारा मेला उदघाटन

शनिबार, माघ २१, २०७९ बागेश्वरी पोस्ट

नरैनापुर (बाँके) । बाँकेको नरैनापुरको मियापुर्वामा रहेको मुस्लिमहरुको प्रसिद्ध धार्मिक स्थल आस्तान ए हजरत खलीफा नूर अहमद शाहको मजार शरीफमा प्रत्येक वर्षझै यस वर्ष पनि उर्श (धार्मिक मेला) सुरु भएको छ ।

प्रत्येक बर्ष माघ महिनामा मजार विकास समितिले प्रसिद्ध बाबा आस्तान ए हजरत खलीफा नूर अहमद शाहकोे उर्स धुमधामको साथ मनाउँदै आएको छ । माघ २० गतेदेखि सुरु भएको उर्समा नेपालसहित छिमेकी मुलुक भारतका लाखौं धार्मिक श्रद्धालु (जाईरीन) हरुको सहभागिता रहेको छ ।

त्यसैगरी, उर्सको अवसरमा रातिको समयमा जलसा (धार्मिक प्रवचन) हुँदै आएको छ भने भाकल गरेकाहरुले दैनिक रुपमा बाबाको मजारमा फतिहा, नियाज तथा धार्मिक क्रियाकलाप गर्ने गरेका छन् ।

बाँकेको नेपालगंजदेखि करिव ४७ किलोमिटर पुर्वमा अवस्थित नरैनापुर गाउँपालिका–२ स्थित आस्तान ए हजरत खलीफा नूर अहमद शाहको मजार शरीफमा लागेको उर्से पाक औलया–ऐ केरामको पहिलो दिन शुक्रवार लुम्बिनी प्रदेशकी मन्त्री कृष्ण केसी नमूना र नरैनापुर गाउँपालिकाका अध्यक्ष इस्तियाक अहमद शाहले संयुक्त रुपमा बाबाको मजारमा चादर चढाउँदै उर्सको उदघाटन गरेको डा.वकार शाहले जानकारी दिए ।

मन्त्री नमूनाले माजार शरीफलाई धार्मिक स्थलको रुपमा विकास गर्नुपर्ने प्रतिबद्धता व्यक्त गरेकी छिन् ।

मजारलाई व्यस्थित बनाएको खण्डमा बाँकेको पर्यटन विकासमा ठूलो टेवा पुग्ने बताउदै मन्त्री नमूनाले मजार शरीफमा खानेपानी, शौचालय, तथा धर्मशलाको काम प्रदेश सरकारबाट गराउने उदघोष गरिन् ।

नरैनापुर गाउँपालिकाका अध्यक्ष एंव मेलाका संरक्षक इस्तियाक अहमद शाहले मजार शरीफ नेपालकै धार्मिक पर्यटकीय क्षेत्र मध्येका एक रहेको बताउँदै उनले मजार शरीफको विकास संघीय, प्रदेश र स्थानीय तीनै तहको सरकारले लगानी गर्नुपर्ने बताए ।

नरैनापुर १ का अध्यक्ष इसाक जोलाहले भने,‘ आस्तान ए हजरत खलीफा नूर अहमद शाह मजार बाँकेवासी वा प्रदेशवासीको मात्रै होइन । यो सम्पूर्ण नेपालवासीको गौरव हो । त्यसकारण यसको संरक्षण र प्रबद्र्धन गर्न सकेको खण्डमा मुलुकको आर्थिक तथा पर्यटन विकासमा ठूलो टेवा पुग्छ ।’ उर्समा सहभागी भएका मन्त्री नमूना, तथा राजनीतिकर्मीहरुलाई मजार विकास समितिका पदाधिकारीहरुले स्वागत गरेका थिए ।

उर्सलाई भव्य बनाउन नेपाल तथा भारतका प्रसिद्ध धार्मिक गुरुहरुलाई प्रवचनको लागि आमन्त्रण गरिएको मजार विकास समितिका संरक्षक रिजवान अहमद शाहले बताए ।

उर्समा सहभागी भएका श्रद्धालुहरुको खानेपानी, आवास तथा स्वास्थ्य उपचारको लागि विभिन्न शिविरहरु सञ्चालन गरिएको समितिका सदस्य गुफरान अहमद शाहले बताए । सुरक्षाको लागि नेपाल प्रहरी, सशस्त्र प्रहरी र करिव दुई सय स्वयमसेवक परिचालन गरिएको रोज अलि जोलाहले जानकारी दिए । सांस्कृतिक, धार्मिक तथा सामाजिक सदभाव कायम राख्नका लागि यो उर्सको महत्वपूर्ण योगदान रहेको स्थानीयहरु बताउँछन् । मेला नरैनापुर २ का अध्यक्ष एंव मेलाका संरक्षक मसूद अहमद शाह लगायतको सहभागिता रहेको थियो ।

प्रकाशित मिति: शनिबार, माघ २१, २०७९ १३:२२

प्रतिक्रिया दिनुहोस्