'टुर डे ठाकुरद्वारा' माघ २७ गते बागेश्वरी मन्दिरबाट

स्थानीय

गृहपृष्ठ
स्थानीय
'टुर डे ठाकुरद्वारा' माघ २७ गते बागेश्वरी मन्दिरबाट

'टुर डे ठाकुरद्वारा' माघ २७ गते बागेश्वरी मन्दिरबाट

ठाकुरद्वारासम्म १०० किलोमिटरको साइकल यात्रा

बुधबार, माघ २५, २०७९ बागेश्वरी पोस्ट

नेपालगन्ज । यही माघ २६, २७ र २८ गते टुर डे ठाकुरद्वाराको पाँचौ संस्करण हुँदैछ । आयोजक नेपालन्ज साइकिलिङ क्लबले आज नेपालगन्जमा पत्रकार सम्मेलन गरेर प्रतियोगिताबारे जानकारी गराएको हो । २९ भारतीय यात्रीसहित करिब ३०० जना सहभागी हुने टुर डे ठाकुरद्वारामा ४२ महिला साइकल यात्री पनि रहनेछन् ।

नेपालगन्ज साइकिलिङ क्लबका अध्यक्ष सतिश निरौलाले माघ २६ गते नेपालगन्ज किड्स रेस पनि आयोजना गरिएको बताए । प्रतियोगितामा ३० जना बालबालिका सहभागी हुनेछन् । माघ २६ गते बाहिरबाट आएका पहुनाहरुलाई पश्चिम नेपालको प्रसिद्ध शक्तिपीठ बागेश्वरी मन्दिरको दर्शन गराई यहाँका अन्य पर्यटकीय स्थलको अवलोकन गराउँदै नगर परिक्रमा गराइनेछ । माघ २७ गते विहान ८ बजे बागेश्वरी मन्दिरबाट औपचारिक कार्यक्रम पश्चात ठाकुरद्वाराको साइकल यात्रा प्रारम्भ गरिने र त्यसै दिन साँझ साढे ५ बजे ठाकुरद्वारा पुगिने निरौलाले बताए । कार्यक्रमको सबै तयारी पूरा भएको उनले जानकारी दिए ।

साइकल यात्रा करिब १०० किलोमिटर हुनेछ । निरौलाका अनुसार टुर डे ठाकुरद्वारामा सहभागिता जनाउन विश्व साइकल यात्री एवम् सगरमाथा आरोही पुष्कर शाह र चर्चित वाइल्ड लाइफ फोटोग्राफर चुङ्ग्वा शेर्पा आउँदैछन् । त्यस क्रममा साइकल यात्रीवीच वातावरण, प्रकृति र बन्यजन्तु संरक्षण सम्बन्धि छलफल गरिने बताइएको छ । यस्तै ठाकुरद्वारा मन्दिर परिसरमा विभिन्न पाँच प्रकारका विशेष विरुवाहरु रोपिने कार्यक्रम संयोजक प्रदिप सापकोटाले बताए । साइकल उत्सवमा अनुमानित कुल लागत खर्च करिव २० लाख लाग्ने आयोजकले बताएको छ ।

बाँके-बर्दियाको पर्या-पर्यटन प्रवर्द्धन गर्ने उद्देश्यले वर्षेनी आयोजना हुँदै आएको टुर डे ठाकुरद्वाराले यस क्षेत्रमा भारतीय पर्यटको आगमनलाई उल्लेख्यरुपमा बढाएको साइकिलिङ क्लबका अध्यक्ष निरौलाले बताए । साइकलका माध्यमबाट पनि यहाँका पर्यटकीय क्षेत्रहरुको भ्रमण गर्न सकिने सन्देशले स्थानीय पर्यटन प्रवर्द्धनमा टेवा पुगेको उनले बताए ।

प्रकाशित मिति: बुधबार, माघ २५, २०७९ १८:४९

प्रतिक्रिया दिनुहोस्